Róža Pinkawina přepodawa zamołwitosć swojemu wnučkej Florianej

Njechorń je wjes z něšto wjace hač sto wobydlerjemi mjez Budyšinom a Wósporkom. Kóždemu Serbej a runje tak mnohim Němcam w kónčinje je wona předewšěm swojeho najwuznamnišeho syna Měr­ćina Nowaka-Njechorńskeho dla znata. To njezadźiwa, wšako serbski moler, grafikar, publicist a spisowaćel z přimjenom „Njechorński“ direktny poćah k swojej ródnej wsy twori.

Tehdy tam hišće serbowachu

Měrćin Nowak narodźi so 1900 w Njechornju a přebywaše tam nimale swoje cyłe žiwjenje. W njeličomnych wuměłskich a literarnych twórbach wěnowaše so wón stajnje rady lubosći k domiznje. „Hižo jako młodostna zeznach Měrćina Nowaka-Njechorńskeho, wulkeho serbskeho prócowarja“, dopomina so Róža Pinkawina ze susodneho Worcyna. „By­dlach tehdy hišće w Radworju, hdys a hdys­ pak jědźechmy k Nowakecom do Njechornja.­“