Štóž je před 30 lětami wědomje dožiwił, kak bě w Berlinje murja padnyła, so zwjetša jara dokładnje dopomina, što je 9. nowembra 1989 činił. Sam na přikład sedźach tehdy w swojej stwě w staršiskim domje. A dokelž bě Radwor w tym času hižo z kablowej telewiziju zastarany, móžach takrjec live dožiwić, zo NDR hranicu wočini. Što to woznamjenješe, pak mi wědome njebě – kaž mnohim druhim tež nic. Tři lětdźesatki pozdźišo chcych wědźeć, što je wot murje zwostało a kak běchu někotři Berlinscy Serbja wone podawki dožiwili. Tohodla so rozsudźich, z kolesom po Berlinskim murjowym puću jěć. Tón wjedźe po 160 kilometrach tam, hdźež je murja něhdy stała, potajkim wokoło cyłeho tehdyšeho Zapadneho Berlina. Dźensa jenož hišće na mało městnach zbytki wuhladaš.