Prócowanja Arnošta Barta wo swójski serbski stat 1919 (2. dźěl a kónc)

5. februara 1919 wuradźowachu na měrowym kongresu wo teritorialnych žadanjach Čěskosłowakskeje republiki (ČSR) a wobjednawachu tak tež „serbske prašenje“. Přitomnaj běštaj mjez druhim jendźelski premierminister David Lloyd George a ameriski prezident Woodrow Wilson.

Po třihodźinskim přednošku čěskeho wonkowneho ministra Edvarda Beneša móžeše Arnošt Bart-Brězynčanski, kiž bě spočatk lěta přez Prahu do Parisa přišoł, žadanja Serbskeho narodneho wuběrka předstajić. Bart rozłožowaše, zo su Serbja posledni powostank wulkeho bywšeho połobskosłowjanskeho ludu a běchu w zašłym lěttysacu wot němskich knježićelow wobstajnje politisce, hospodarsce a narodnje potłóčowani.