W druhej połojcy apryla/spočatk meje 1945 bu Hornja Łužica wot Čerwjeneje armeje a 2. pólskeje armeje wuswobodźena. Někotři serbscy prócowarjo zetkachu so 24. apryla 1945 w Chrósćicach pola Natušec, zo bychu wo znowazałoženju 18. měrca 1937 zakazaneje Domowiny wuradźowali.

Hłowni iniciatorojo zetkanja běchu z Drježdźanskeho jastwa 13. februara wućeknjenaj dr. Jan Cyž a Jan Meškank kaž tež Chróšćan Franc Natuš. Pola njeho, bywšeho župana župy „Michał Hórnik“, zetka so dr. Jan Cyž 24. apryla prěni raz z někotrymi něhdyšimi aktiwnymi Domowinjanami, kotřiž wutworichu wuběrk za wozrodźenje Domowiny.

10. meje 1945, dwaj dnjej po kapitulaciji fašistiskeje Němskeje, zeńdźechu so serbscy prócowarjo pola Čunkec w Chrósćicach, zo bychu narodnu organizaciju wozrodźili. Nimo dr. Cyža, jeho syna Jana a Jana Meškanka bě tam pjatnaće dalšich Serbow z Hórkow, Worklec, Njebjelčic a Chrósćic, mjez nimi Franc Natuš, kantor Jan Lipič, časnikar Jurij Mencel a inženjer dr. Jurij Ješka z Kopšina. Woni Domowinu znowa załožichu.