Serbski Sokoł woswjeći 9. nowembra
Wo Serbskim Sokole zhonich prěni raz wobšěrnje jako student w čitanjach prof. dr. Jana Brankačka na Lipšćanskej uniwersiće. Běch hnydom zahorjeny wo skutkowanju sportoweho towarstwa. Tuž rozsudźich so na kóncu swojeho studija slawistiki 1968/69 diplomowe dźěło napisać wo temje „Zur Geschichte der sorbischen Sokolbewegung (1920–1933) – unter besonderer Berücksichtigung ihrer sozialen Struktur“. We wulkich prózdninach do poslednjeho studijneho lěta počach wo Sokole rešeršować. Jězdźach z kolesom po wsach – tam, hdźež skutkowaše 21 sokołskich jednotow. Při tym wopytowach bywšich čłonow Sokoła, zo bych sej wo sportowym hibanju informacije, ale tež material kaž fota a dalše dokumenty z woneho časa nazběrał. Dóstach mnoho fotow, dokumentow a wažnych informacijow. Přeslědźich serbske a němske časopisy a nowiny kaž tež archiwy. Tak nasta moje diplomowe dźěło, kotrež po studiju za dalše slědźenje wužiwach, zo by nastała kniha „Serbski Sokoł“, kotraž je 1990 w Budyskim Ludowym nakładnistwje Domowiny wušła.
K stawiznam a skutkowanju towarstwa
