K wuznamnym wosobam Hórkow słuša bjezdwěla tež dr. Reinhard Kušk. Jara mało ludźi dźensa tele mjeno hišće znaje. Wšako bě Kušk 3. januara 1963 hakle 36lětny zemrěł.
Štó bě nětko tónle sławny Hórčan?
Reinhard Kušk narodźi so 29. měrca 1926 swójbje Jurja Kuška a jeho mandźelskeje Marty w nimale poslednim domčku na prawym boku puća do Chrósćic. Wón wopyta wot lěta 1933 do 1941 ludowu šulu w Chrósćicach. Po tym dźěše na Wyšu wobchadnu šulu w Kamjencu. Hižo jako 18lětny dyrbješe w lěće 1944 do wójska. Jako so z wójnskeje jatby wróći, sta so hnydom po krótkim wukubłanju w lěće 1946 z nowowučerjom we Worklecach. Tu pak dołho njewosta. Hromadźe z dalšimi serbskimi młodźencami zmuži so dwě lěće pozdźišo na studij matematiki, fyziki a chemije do Wrócławja, hdźež zakónči swój studij z diplomom 1. stopnja. Dokelž pak we Łužicy žanoho wotpowědneho dźěłoweho městna njenamaka, poda so do Berlina.
