Róžeńčanska Šołćic pjekarnja zhladuje na zajimawe stawizny a 200lětne wobstaće

Pječwo z Róžanta njeje jenož w Hornjej Łužicy, ale daloko za jeje mjezy znate a připóznate. Tež w Drježdźanach, w Lipsku, haj samo we wokolinje Wittenberga a njedaloko Neuruppina sej ludźo Róžeńčanski pjekarski chlěb a tykanc chwala. Zawěsće zaleži to na tym, zo mějachu Róžeńčanscy „Pjekarjecy“ chwile dosć, swoje recepty nic jenož wot generacije ke generaciji dale dawać, ale je stajnje tež zlěpšować. A po 200 lětach, kotrež Róžeńčanska pjekarnja mjeztym wobsteji, njemóža tam jenož na wysokokwalitne pječwo zhladować, ale zdobom na bohate a zajimawe stawizny.