Marko Rjeda je srjedź oktobra pjeć dnjow w dalokim wukraju přebywał. Słužbna jězba wjedźeše jeho do Israela. Z předawarjom ratarskich mašinow pola Budissa Agroservice tzwr, kotraž je wotnožka Budissa Agrar AG, je so Milenka Rječcyna rozmołwjała.
Kotre powołanje w předewzaću wukonjeće?
M. Rjeda: Sym předawar za mašiny, kotrež silažu abo trejdu w folijowych hadźicach składuja. Wone wobsteja z polyetylena, to rěka z plasty. To njeje někajka wuska hadźica, kaž ju w zahrodźe trjebamy. Naše maja přeměr 2,7 metrow a wjace. Su-li pjelnjene a składowane, maja formu elipsy, kotraž je něhdźe dwaj metraj wysoka. Tele šlawchi móža hač do 150 metrow dołhe być, do Israela smy 75metrowske předawali.
Kak je k tomu dóšło, zo sće w Israelu přebywał?
