Torož na kromje Radworskeje nawsy po ponowjenju zaso wožiwjena

Hnydom zwoprědka prajene: Štóž so nadźija, w Radworskej „toroži“ na nawsy – kotrejž Radworčenjo hač do dźensnišeho „Tor(bogen)haus“ praja – hišće atmosferu stareho časa dožiwić móc, budźe přesłapjeny. Jenož na přizemju stareho twarjenja z lěta 1687 wony duch hišće knježi: z mócnymi šěrokimi murjemi, wjelbowanym wjerchom a starym centralnym wohnišćom z klinkerowymi cyhelemi, połnymi sazow tehdyšeho časa.

W rjedźe historiskich twarjenjow w Radworju zaběra torož wosebite městno. Wona bě pječa prěnje kamjentne twarjenje we wsy scyła, słušeše do hrodoweho twarskeho kompleksa a měješe swój čas wrota, wo kotrychž zbytki drjewjanych hrjadow na woběmaj bokomaj wobłuka hišće dźensa swědča. We wulkej pincy pod torožu bě pječa piwarnja knježeho dwora. Dom sam słužeše w prěnim rjedźe jako skład. Tole dopokazuja historiske fota z časa do Druheje swětoweje wójny. Na nich widźiš jasne škałby, kotrež słužachu přewětrjenju twarjenja. Wokna hornjeho poschoda běchu hakle po wójnje zatwarili.