Złokomorowska manufaktura z Jürgenom Drewsom a Antoniju z Tirola za „wótry žołty“ z łužiskeje jězoriny wabiła
Blešu po bleši wonaj starosćiwje zapakujetaj. A pjelnjenska mašina njemjelči, njepřestawajcy ćeče z njeje jejkowy liker. „Rady tu dźěłam. Dźěło je wotměnjawe. Kóždy je we wšelakich wobłukach zasadźomny. To saha wot produkcije přez wotpjelnjenje a zapakowanje hač k předani we wobchodźe a wšelakim nadawkam w běrowje.“ To powěda Yvonne Hanf, mjeztym štyri lěta sobudźěłaćerka w Złokomorowskej manufakturje „Wótry žołty“. Runje wona ze swojim kolegu Stefanom Kühnom twory zapakuje. Wobaj słušataj k wosom přistajenym, kotřiž w zawodźe, wot lěta 2010 wobstejacym, dźěłaja.
„Tradicionalnje zhotowjamy jejkowy liker w ručnym dźěle po swójbnym recepće, štož dale naš zakład wostawa“, wujasnja Heiko Tänzer. Wón a Danilo Trasper manufakturu nawjedujetaj a staj jednaćelej. „To jónkrótne na našim likeru stej wosebita maznosć a wulka mnohotnosć družin. W zašłych 13 lětach smy něhdźe 75 družin likera kreěrowali a zhotowili. Dźesać do dwanaće družin mamy stajnje w poskitku.“
