Na kupach Acorow wosrjedź Atlantika jónkrótne zaćišće hromadźiłoj a kraj a ludźi zeznałoj – zapadny dźěl kupy São Miguel (1)
Skupina Acorskich kupow wobsteji z cyłkownje dźewjeć wjetšich a mjeńšich kupow z cyłkownej płoninu 2 351 kwadratnych kilometrow a ma 236 600 wobydlerjow. Acory słušeja k Portugalskej a su 1 500 kilometrow wot tamnišeje stolicy Lissabona zdalene. Hłowne město Acorow je Ponta Delgada na kupje São Miguel.Acorska wyšina stara so w srjedźnej Europje wo stabilne a přijomne wjedro. Chcychmoj so tuž z mandźelskej raz samaj wo tym přeswědčić. Wjacorych přičin dla njemóžachmoj w optimalnym počasu na kupy jěć, ale najebać to mějachmoj tam tež w nowembrje dobry čas. Podachmoj so z lětadłom wot Berlina do Lissabona a po krótkej přestawce přizemichmoj w Ponta Delgada. Tam dožiwichmoj po wjele lětach zaso jónu aplaws za pilota za dobre přizemjenje, štož je na małych kupach z krótkimi startowymi a přizemjenskimi čarami woprawdźite wuměłstwo. Kupy přeslědźiš najlěpje z awtom.
