Na zakładnej šuli w Nowej Wsy rozžohnuje so dźensa wjelelětna šulska nawodnica Karin Weiß po wjace hač 40 powołanskich lětach na wuměnk. Wona je kubłanišćo wot jeho załoženja w lěće 1992 nawjedowała.
Karin Weiß je w Nowej Wsy nad Sprjewju wotrostła, hdźež 63lětna dźensa tež bydli. Wona je wot 1. do 10. lětnika w ródnej wsy do šule chodźiła, štož běše tehdy polytechniska wyša šula. Za nju běše jasne, zo chce so z wučerku stać. Tuž je wona štyri lěta na wučerskim wustawje w Choćebuzu studowała. Ze zakónčenjom běše wona wučerka za šulerjow wot 1. do 4. lětnika. Za čas NDR njemóžachu sej nowi wučerjo wupytać, hdźe chcedźa wuwučować. To stat postajowaše a tuž wuwučowaše Karin Weiß prěnich pjeć lět w Gubinje a Wojerecach. 1988 pak bě w šuli w Nowej Wsy městno swobodne a tuž so wona do domizny nawróći. Po babyjowym lěće 1991 slědowaše nowy zazběh do powołanskeho žiwjenja, bórze na to bu za šulsku nawodnicu pomjenowana, přetož 1992 sta so z POS zakładna a wyša šula po zakonju Zwjazkoweje republiki Němskeje.
