Serbske powójnske hibanje před 80 lětami – 2. dźěl

Před 80 lětami bě Hornja Łužica mjez Budyšinom a Kamjencom krawne bitwišćo – wuraz „Dolina smjerće“ na to dopomina. Loni je Benedikt Cyž wo tym přinošk z třoch dźělow za Předźenak napisał. Tónkróć wěnuje so wón serbskemu powójnskemu hibanju před 80 lětami. Hibanje docpě swój wjeršk 27. januara 1946 z wólbu do Łužisko-serbskeho narodneho wuběrka, štož běše poprawny legitimowany politiski gremij w Hornjej Łužicy. Wuběrk bu wot Łužisko-serbskeje narodneje rady (ŁSNR) nawjedowany. Za čas NDR je so tuta doba mjenje abo bóle zamjelčała.

Dalše serbske iniciatiwy

W Sakskej je so 1. septembra 1945 nowe šulske lěto zahajiło. Wuskutki 12lětneje germanizacije běchu w serbskich šulach pytnyć. Wučerjo pobrachowachu. Z Łužicy wuhnaći wučerjo a duchowni so drje domoj nawróćichu, ale to njedosahaše, Někotři wučerjo njesmědźachu přisłušnosće w stronje NSDAP dla wuwučować. Tohodla bu 9. septembra prěni serbski kurs za nowowučerjow w Radworskim hrodźe zarjadowany.