Na teologiskej fakulće Martina Lutheroweje uniwersity Halle-Wittenberg skutkuje institut za systematisku teologiju, praktisku teologiju a nabožne wědomosće. Z wědomostnej sobudźěłaćerku na tamnišim dźěłanišću za nabožne ­komunikaciske a wuknjenske procesy (RKL), z fararku dr. Corneliju Ruthendorf-Przewoski, je so Milenka Rječcyna rozmołwjała.

Uniwersita přeprošuje tónle kónc tydźenja na konferencu z temu „móc-bjezmóc-sylnosć – ewangelska cyrkej jako mjeńšina w sekularnej towaršnosći“. Wy sće namjetowała, tež Serbow do disku­sije zapřijeć. Čehodla?

Smy jako křesćenjo w Němskej mjeztym mjeńšina, štož naš swětonahlad nastupa. Wjetšina ludźi w našim kraju so křesćanskemu Bohu wjace njedowěrja. Mjez Serbami pak je hišće mnohich, kotřiž wěrja, byrnjež tež tam rozdźělow było. Mamy we wšelakich kónčinach wšelaku wulku ličbu ewangelskich a romsko-katolskich wěriwych Serbow. Tohodla rěčimy wo mjeńšinach, kotrež su tema konferency. A k tomu słušeja serbscy ewangelscy wěriwy.

Kak su organizatorojo konferency na Waš namjet reagowali?