Iniciatiwna skupina Křesćanskich staršich w Kulowje hižo 35 lět potrěbnym w nuzy pomha

Oleg bydli a stara so wo swojich šěsć dźěći a małeho wnuka cyle sam. Jeho mandźelska Svetlana je dušinje chora. „Něhdy je so 35lětna wo dźěći starała, mjeztym zo je Oleg dźěłał a tak swójbu zežiwił. Tola jako přińdźe mandźelska do chorownje, dyrbješe Oleg swoje dźěłowe městno wupowědźić a so wotnětka sam wo hladanje dźěći starać“, rysujetaj Angela Popella a Edith Skopi z iniciatiwneje skupiny Křesćanscy starši w Kulowje jeho połoženje. Wot lěta 1994 podpěruje iniciatiwa wobstajnje swójby a samokubłacych w ruskim Pětrohrodźe, tež Olega. Předewšěm jedna so při tym wo chudych, chorych, zbrašenych, zadołženych abo wot domjaceje namocy potrjechenych wobydlerjow. To su ludźo, kotřiž dyrbja ćežke situacije zmištrować.