Drježdźany (SN). Rjemjeslniska komora Drježdźany chce ludźom wšelakorosć wuměłskeho rjemjesła na dožiwjenjowpołne wašnje zbližić a namołwja zajimcow, so wot 31. měrca do 2. apryla na Europskich dnjach wuměłskeho rjemjesła wobdźělić. Hač su to knihiwjazarjo, škleńcudujerjo abo kowarjo – wšitcy móža­ potom swoje dźěłarnje spřistupnić a ludźom pohlad za kulisy kreatiwneje sceny sposrědkować.

Drježdźanska rjemjeslniska komora organizuje wosebite dny w swojim komornym wokrjesu. Na internetnej stronje www.kunsthandwerkstage.de móža so zajimcy wobhonić a přizjewić. Dale podpěruje komora wobdźělnikow nastupajo zjawnostne dźěło, přewostaji jim tež plakaty a podobne wabjenske materialije. „Na Europskich dnjach wuměłskeho rjemjeslnistwa njemóža wopytowarjo jeno za kulisy dźěłarnjow pohladać. Tam změja składnosć so tohorunja wo wu­kubłanskich móžnosćach informować“, zdźěla hłowny jednaćel rjemjeslniskeje komory Andreas Brzezinski.

Wopak pjelnjeneho žołteho wotpadkoweho měcha dla buštaj w porynsko-pfalcskim Niederschlettenbachu sobudźěłaćerjej wotpadkoweje firmy nad­padnjenaj a zranjenaj. Mužej w starobje 35 a 56 lět běštaj z nakładnym awtom po puću, zo byštaj žołte měchi zběrałoj. Při tym napadny jimaj měch, hdźež běchu wotpadki, kotrež do njeho njesłu­šeja. Jedyn ze sobudźěłaćerjow jón wočini a započa wopačne wotpadki wuběrać. Zawinowar, tole wobkedźbujo, zadźerža awto, da so do šofera a storči jeho k schodej. Jako kolega na pomoc přińdźe, bu tohorunja atakowany. Policija přepytuje nětko werbalneho a ćělneho ranjenja kaž tež wohrožowanja dla.

Tež tři dny po hawariji 95 metrow wysokeho wětrnika w Sittenje pola Leisniga přeco hišće njewědźa, kak je k njezbožu dóšło. Tež wobjim škody hišće njeznaja. Fachowcy za techniku a zastupnicy zawěsćernje naležnosć tuchwilu přepytuja. Lěta 1999 natwarjenu připrawu běchu hakle w lěću inspicěrowali. Hoberski wětrnik bě so minjenu wutoru wotłamał a na zemju zrazył.

Berlin (dpa/SN). Zwjazkowe statne rěč­nistwo pruwuje, hač sej přećiwo wčera zajatemu pozdatnemu pomocnikej atentatnika Anisa Amrija wukaz zajeća žada. Dotalne přepytowanja na to pokazuja, zo bě muž, pochadźacy runja nadpadnikej z Tuneziskeje, do atentata splećeny. Při nadpadźe póndźelu do hód bě w Berlinje dwanaće ludźi žiwjenje přisadźiło. Nimale połsta so zdźěla ćežko zrani.

Tež ćěkancy stražnicy byli

Köln (dpa/SN). W silwesterskej nocy 2015 w Kölnje běchu po informacijach medijow dźesatki ćěkancow bjez wotpowědneho wukubłanja jako stražnicy zasadźeni. Po rešeršach nowiny Bild bě priwatna wěstotna firma w přebywarnjach ćěkancow 59 muži nawabiła. Ćěkancy, kotřiž pochadźachu ze sewjerneje Afriki, Syriskeje a Afghanistana, běchu hakle krótki čas w Němskej. Firma wupłaći jim pjeć eurow na hodźinu, wot města pak žadaše sej 15,40 eurow.

Třěleńcy najebać přiměr