Milano/Berlin (dpa/SN). Atentatnik, kiž bě póndźelu wječor na Berlinskich dohodownych wikach dwanaće ludźi morił a nimale 50 zdźěla ćežko zranił, je mor­twy. Kaž italski nutřkowny minister Marco Minniti dźensa dopołdnja zdźěli, su pozdatneho islamskeho terorista Anisa Amrija w Milanu zatřělili. Policistaj běštaj Amrija wokoło 4 hodź. před dwórnišćom narěčałoj a sej jeho papjery žadałoj. Na to wućahny Amri pistolu a zrani jednoho z njeju na ramjenju. Tamny policist atentatnika na to zatřěli. Tunezičan njeměješe wosobinske dokumenty při sebi. Móžachu pak jeho na zakładźe wotćišća porsta dokładnje identifikować. Wón bě prawdźepodobnje z ćahom z Francoskeje přijěł. Amri bě něšto lět w Italskej bydlił a tam tež wěsty čas w jastwje był. Zwjazkowe knježerstwo je so italskim zamołwitym mjeztym za wuske zhromadne dźěło dźakowało.

Frankfurt n. M. (dpa/SN). Němska banka dyrbi dubiozneho wikowanja z hypotekami dla w USA „jenož“ 7,2 miliardźe dolarow pokuty resp. wotškódnjenja płaćić. Na to su so zastupnicy banki z justicu USA dojednali, kaž dźensa rano zdźělichu. Spočatnje bě bance samo pokuta 14 miliardow dolarow hrozyła. W septembru bě to sej justicne ministerstwo we Washingtonje žadało a tak dalšu krizu banki wuskutkowało. Koncern bě naposledk nimale šěsć mrd. eurow składował, zo móhł hrožace pokuty zapłaćić.

Moskwa (dpa/SN). Politisce aktiwny wnuk něhdyšeho sowjetskeho diktatora Józefa Stalina je njeboh. Jewgenij Dźugašwili je 80lětny w Moskwje zemrěł. Tole rozprawja powěsćernja Tass, powołujo so na informacije lěkarjow. Syn najstaršeho dźěsća Stalina Jakowa bě stajnje zaso podarmo před sudnistwami přećiwo pozdatnemu wočornjenju swojeho dźěda skoržił. Naposledk je něhdyši oficěr na wuměnku w oktobrje před sudnistwom zwrěšćił. Tam bě wón přećiwo nowej stawizniskej wučbnicy skoržił. W njej wšak korektnje na to pokazuja, zo běchu na přikaz sowjetskeho centralneho komiteja, potajkim tehdyšeho wyšeho rozkazowarja Józefa Stalina, dźesaćitysacy pólskich oficěrow w Katynskich lěsach 1940 morili. Stalin (1878–1953) rěkaše poprawom Dźugašwili. Wón pochadźa z georgiskeho města Gori. Jeho wnuk bě ruski­ a georgiski staćan a bydleše w Moskwje a Tbilissiju.

Stalin bě w Sowjetskim zwjazku mjez druhim wina na masowych deportacijach a na morjenju milionow ludźi.

Tójšto zboža měješe wopity muž w Nürnbergu, jako jeho železnica přejědźe. 21lětny ležeše po informacijach policije „chětro za alkoholom wonjacy“ na kolijach Nürnbergskeho dwórnišća. Lokomotiwnik přijěduceho spěšnoćaha njemóžeše­ hižo w prawym času zaborzdźić a přejědźe muža, kiž po dołhosći wosrjedź kolijow ležeše. Njezranjeneho dowjeze wuchowanska słužba natutkaneho muža do chorownje. Jeho drje nětko strašneho zapřimnjenja do železniskeho wobchada dla wobskorža.

Nowe rekordy drje lětsa zaso na Drježdźanskich dohodownych wikach nastaja. Město trochuje, zo budźe to 2,5 milionow wopytowarjow, kaž dźensa rěkaše. Loni bě jich 2,2 milionaj. Tež horce wino tam derje předawaja: Dotal bě to 730 000 hornčkow, 120 000 wjace hač před lětom. Hač do jutřišeho w 14 hodź. su dohodowne wiki hišće přistupne.