To a tamne (18.10.24)
Kostim znateje postawy za wodźidłom awta njeje šofera před chłostanku wuchował. Policija bě na awtodróze A45 pola Dortmunda w septembru awto błyskła, kotrež bě přespěšnje po puću. Na foće widźeć bě šofer z wjesołym kostimom na hłowje, kiž dopominaše na „srjódkaty monster“ z dźěćaceje telewizy. Jědnaće km/h přespěšnje a kostim na hłowje wunjesechu pokutu 40 eurow. Ta je mjeztym zapłaćena.
Měd pod pódušu je paducha w Mannheimje přeradźił. Policisća wuhladachu lěpjatu maćiznu, kotraž wjedźeše jich ze šule k bydlenskemu domej. Tam zajachu 27lětneho muža. W bydlenju namakachu zastojnicy lěpjatu z mjedom zamazanu drastu a dźěl rubizny. Paduch bě so do šule zadobył a při pytanju za pjenjezami kistu z mjedom powalił. Na to so někotre škleńcy rozbichu.
Wjeršk EU w Brüsselu
Brüssel (dpa/SN). Statni a knježerstwowi šefojo 27 čłonskich krajow EU su so dźensa dopołdnja w Brüsselu k wuradźowanjam wo wójnje w Ukrainje, wo njeregularnej migraciji do Europy a wo wójnje na Bliskim wuchodźe zešli. Rěčeć chcychu tež wo nowym centrumje ćěkancow w Albanskej, hdźež chce Italska azylowe jednanja spěšnišo přewjesć. Na wuradźowanju wočakowachu tež ukrainskeho prezidenta Wolodymyra Zelenskeho.
Dalše miliony dolarow Ukrainje
Washington (dpa/SN). Prezident USA Joe Biden je dalšej wojerskej pomocy 425 milionow dolarow na dobro wot Ruskeje nadpadnjeneje Ukrainy přizwolił. Paket wopřija přidatne kapacity za powětrowy škit, pancerowane jězdźidła a municiju, Běły dom zdźěla. Biden je ukrainskemu prezidentej Wolodymyrej Zelenskemu nimo toho telefonisce přilubił, jemu sta lětadła wotwobarace rakety, systemy powětroweho škita a kanony z wulkim mnóstwom municije přewostajić.
Borzdźidło podruže podlěšić
Wjace hač 5 000 ludźi je so wčera na wotewrjenju noweho mórskeho ...
Sejm za reformu chorownjow
Harris přilubja swójsku politiku
Washington (dpa/SN). Kandidatka za prezidentku USA Kamala Harris nochce w padźe wólbneho dobyća politiku swojeho předchadnika prosće dale wjesć. „Praju cyle jasnje, zo njebudźe moje prezidentstwo žane pokročowanje prezidentstwa Joewa Bidena“, rjekny demokratka w telewizijnej rozmołwje z konserwatiwnym sćelakom Fox News. Wona chcyła swoje žiwjenske nazhonjenja, swoje powołanske znajomosće a „čerstwe a nowe ideje“ přinošować. Nimo toho reprezentuje wona nowu generaciju.
Amtěrowacej wiceprezidentce dawaja we wólbnym boju tež sobuwinu za komdźenjach aktualneho knježerstwa Bidena wot lěta 2021. Bě to prěni interview Harris z konserwatiwnymi medijemi.
Ruska: Plan Zelenskeho diktat USA
Moskwa (dpa/SN). Ruske knježerstwo ma tak mjenowany plan dobyća ukrainskeho prezidenta Wolodymyra Zelenskeho za diktat USA. Za tym njetči ničo druheho hač ameriski wotpohlad, wójnu dale wjesć a „hač k poslednjemu Ukrainjanej přećiwo nam wojować“, zdźěli rěčnik Krjemla Dmitrij Pjeskow. Po swójskich wuprajenjach pak njeje wón wustup Zelenskeho w ukrainskim parlamenće ani widźał, ruske medije rozprawjeja.
Pjeskow rjekny, zo je kónc wójny hakle móžny, hdyž Ukraina, kaž wón formulowaše, „bjezwuhladnosć swojej politiki“ skónčnje dowidźi.
Zelenskyj bě w swojim dotal tajnym planje wjacore dypki naličił, kotrež maja Ukrainje dobyće zaručić. Tak žada sej spěšne čłonstwo kraja w NATO, dalše brónje ze zapada, kiž móhli so přećiwo objektam w Ruskej zasadźić, a masiwne brónjenje Ukrainy, štož měło Rusku wottrašić. Nic naposledk poskićuje zapadnym zwjazkarjam zemske pokłady Ukrainy, kotrež su „wjacore biliony dolarow“ hódne, kaž wón rjekny.
Młodźina demokratiji dowěrja
Shellowa studija pokazuje starosće a trend do prawicarskeho směra
Berlin (dpa/SN). Młodźi ludźo njejsu najebać wulke starosće dowěru do stata zhubili. To je jadrowe poselstwo mjeztym 19. tak mjenowaneje Shelloweje młodźinskeje studije, kiž su wutoru w Berlinje předstajili. Na reprezentatiwnym naprašowanju w nadawku energijoweho předewzaća Shell je so spočatk lěta 2 500 młodych ludźi mjez dwanaće a 25 lětami wobdźěliło.
Prěni króć je 50 procentow wšěch młodostnych rjekło, zo zajimuje so za politiku. To je rekordny wuslědk přirunujo z naprašowanjom 2019, jako přihłosowaše 41 procentow tutomu prašenju. Prěni raz su tež hólcy a holcy w samsnej měrje zajimowani, rozłoži nawoda přepytowanja Mathias Albert Bielefeldskeje uniwersity. Do toho běchu młodźi mužojo stajnje bóle zajimowani.
W samsnym čołmiku
Liam Payne znjezbožił
impresum
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Wyša redaktorka: Bianka Šeferowa 577 230
tel.: 03591 577 232 faks: 03591 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Serwis za abonentow: 577 263
Předań nawěškow: Jadwiga Šołćic 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
