Drježdźany (SN). „Dyrbimy tež z AfD rěčeć!“ To sej žada šěsć prominentnych ­čłonow sakskeje CDU. Podpisali su třo něhdyši krajni radojo, něhdyša wjelelětna zapósłanča zwjazkoweho a krajneho sejma Angelika Pfeiffer kaž tež Frank Kupfer a Manfred Kolbe, kotrajž běštaj w Sakskej ministraj za ratarstwo a justicu. W lisće su pisali, zo njesmě CDU jenož ze stronami na lěwym boku kooperować, hewak swój wičnohospodarski profil přisadźi. Respekta před 30 procentami wolerjow AfD dla dyrbjeli ze stronu rěčeć. „Wohnjoškitne murje“ ludnosć njerozumi: „Politiski ­přećiwnik, kiž namóc njenałožuje, njeje njepřećel. Wšitcy demokratisce woleni ­zapósłancy maja ze wšitkimi wolenymi zapósłancami rěčeć.“

Damaskus/Tel Aviv (dpa/SN). Po informacijach syriskich medijow su israelske wojerske lětadła při nalětach na syrisku stolicu Damaskus ludźi morili. Syriske zakitowanske ministerstwo rěči wo znajmjeńša sydom smjertnych woporach. Při nadpadźe su rakety dom trjechili, w kotrymž běchu wobchody a bydlenja zaměstnjene. Rumnosće wužiwali su pječa wysokorjadni zastupnicy iranskich rewoluciskich gardow a milicy Hisbollah.

Při zražce rakety z Libanona w třećim najwjetšim israelskim měsće Haifa je so wobydlerka zraniła. Israelska armeja je znajmjeńša 180 raketow zličiła, kotrež měrjachu so z Libanona na sewjer Israela a wosebje na Haifa. Wjacore rakety su město trjechili a twarjenja wobškodźili.

Strasbourg (dpa/SN). Madźarski ministerski prezident Viktor Orbán žada sej jako reakciju na dale trajacu ilegalnu migraciju do Europskeje unije prawidłowne wjerškowe zetkanja statnych a knježerstwowych šefow Schengenskich krajow. Je to migraciska kriza, kotruž je EU posledni raz w lěće 2015 tak dožiwiła, rjekny Orbán dźensa w narěči před Europskim parlamentom. Wobsteji strach, zo Schengenski rum, kiž bě jako pasmo bjez pomjeznych kontrolow mysleny, rozpadnje. Na přede­wzaću wobdźěla so tuchwilu 25 z cyłkownje 27 krajow. Konkretnje Orbán namjetuje, azylowe jednanja přichodnje zwonka EU přewjesć, zo njebychu migranća bjez přizwolenja do EU přišli. „Móžemy jenož tych do EU pušćić, kotrymž smy to do toho dowolili.“ Prezidentka komisije EU Ursula von der Leyen skedźbni na wobstejace rjadowanja EU, kotrež měli so přesadźić. Orbánej wumjetowaše, zo ilegalnu migraciju podpěruje. Tak kraj pašowarjow dočasnje z jastwa pušći, Rusam zapućowanje do EU dowola a chinskej policiji zmóžnja, w Madźarskej dźěłać.

Zwjazkowe knježerstwo reaguje na słabe wuwiće hospodarstwa

Berlin (dpa/SN). Zwjazkowy minister za hospodarstwo Robert Habeck (Zeleni) chcyše dźensa popołdnju w Berlinje nowy posudk zwjazkoweho knježerstwa nastupajo wuhlady na wuwiće hospodarstwa předstajić. Powšitkownje wočakowachu, zo knježerstwo nowu prognozu zniži. Wšako hospodarski wukon Němskeje dale woteběra.

Poprawom bě Habeck za lěto 2024 snadny rozrost nutřkokrajneho bruttoprodukta, 0,3 procenty, wočakował. Nětko liča z minusom: 0,2 procentaj. Klětu liči Habeck zaso z rozrostom nutřko­krajneho bruttoprodukta – sumy wšěch na­dźěłanych hódnotow – něhdźe 1,1 procenta.

Ličby su zakład wočakowaneho trochowanja dawkowych dochodow. Snadniše dawkowe dochody hač wobličene kaž tež wyše wudawki za socialne za­wěsćenje, móhli etatowe jednanja amploweje koalicije SPD, Zelenych a FDP poćežować. Zdobom pak woznamjenjeja špatniše wuhlady na hospodarski rozrost, zo smě zwjazkowe knježerstwo na zakładźe mechanizma borzdźidła zadołženja wjace kreditow brać.