Wuslědk wólbow njeje intendantow NSLDź a SLA překwapił; na njón nastupajo program reagować nimataj za trěbne. Wobě instituciji wobhladujetej so nadal jako poskićerjej dialoga ze zasadu, wotbłyšćować wjelorakosć, zakitować swobodu wuměłstwa a nic naposledk reprezentować serbsku kulturu. Přiwšěm nastajitaj so na konsekwency, kotrež móhli z nowowobsadźenjow za financowanje zamołwitych gremijow wurosć. Spěchowanje Budyskeho Thespis-centruma je jenož hišće hač do kónca lěta zaručene, a hižo do wólbow bě dramaturgowka NSLDź wo hroženjach rozprawiła, „srědki jenož přizwolić, spodobaja-li so wobsahi zjawnym pjenjezydawarjam“. Po Hillmannu bě drje dale knježacy sakski premier „stajnje spušćomny a kompetentny partner“; Budyski krajny rada je wospjet přilubił, „skrótšenjam na polu sporta a kultury“ zadźěwać. Dotal wšak bě kultura často prěni adresat „čerwjeneho pisaka“, ručež ma so něhdźe lutować. Na da: Bóh dał. Bosćan Nawka

Powostanki sławneje łódźe „Titanic“ rozpaduja. Tole dokumentuja wobrazy najnowšeje ekspedicije slědźerjow k podnurjenej łódźi w Atlantiskim oceanje. Tak je dźěl prědnjeho kónca łódźe wotpadnył. Dopokaz to přiběraceho rozpadowanja wocla w „njepřećelskej mórskej wokolinje“. „Titanic“ bě so 1912 po zražce z lodowcom podnuriła. Po dołhim pytanju běchu wrak 1985 něhdźe 3 800 metrow hłuboko w morju namakali.

Swój dotalny swětowy rekord při póžěranju hotdogow přetrjechił je Joey Chestnut z USA. Na wšěch 83 kołbaskow w całće je 40lětny w běhu dźesać mjeńšin w Las Vegasu zjědł. Dotalny rekord wučinješe 76 hotdogow. Jeho konkurent Takeru ­Kobayashi z Japanskeje je swój dotalny rekord tohorunja polěpšił, docpě pak ­„jenož“ 66 kołbaskow. Dobyćer móžeše myto 100 000 dolarow sobu domoj wzać.

Berlin (dpa/SN). Najwyši organ Dźěłarnistwa lokomotiwnikow Němskeje GdL, tak mjenowana generalna zhromadźizna, je so dźensa w Drježdźanach zešła, zo by naslědnika wjelelětneho předsydy dźěłarnistwa Clausa Weselskeho wuzwoliła. Po 16 lětach na čole zastupnistwa lokomotiwnikow a mnohich dołhich tarifowych rozestajenjach woteńdźe 65lětny na wuměnk. Móžny naslědnik je dotalny městopředsyda Mario Reiß. Tón pochadźe runje tak kaž Weselsky ze Sakskeje.

Bamž na dołhu jězbu so podał

Rom (dpa/SN). Na najdlěšu wukrajnu jězbu swojeho zastojnstwa je so bamž Franciskus dźensa podał. 87lětna hłowa katolskeje cyrkwje chce přichodnych dwanaće dnjow štyri kraje juhowuchodneje Aziskeje a Oceaniskeje wopytać. K za­hajenju wočakuja jeho w Indoneziskej, z wjace hač 240 milionami muslimow na wobydlerjach najbohatši muslimski kraj swěta. Dalše stacije su Papua-Nowa Guinea, Wuchodny Timor a Singapur.

Tež druhim popłatki skrótšić

Tel Aviv/Gaza (dpa/SN). W Israelu statysacy ludźi protestowachu a sej žadachu, zo ma knježerstwo hnydom zrěčenje z islamistiskej Hamas wobzamknyć. Protesty su wot zahajenja wójny w Gazaskim pasmje drje najwjetše. Přičina toho su namakane ćěła šěsć zastajencow. Třěšny zwjazk dźěłarnistwow je dźensa ludźi ke generalnemu stawkej namołwjał, zo ­móhli wjace ćišća na šefa israelskeho knježerstwa Benjamina Netanjahuwa wukonjeć.

Při protestach w Tel Avivje a druhich městach kraja su wobdźělnicy z policistami wojowali. Kaž medije w Israelu rozprawjeja, su zastojnicy wjele ludźi zajeli. Dale organizatorojo zdźěla, je so jeničce w Tel Avivje 300 000 ludźi zešło. Oficialnych ­ličbow tuchwilu žanych njeje.