Lipsk (dpa/SN). Při wólbach do krajneho sejma 1. septembra měri so Bündnis ­Sahry Wagenknecht w Sakskej a Durinskej na wuslědki nad dźesać procentami. To je aktualny wuslědk wólbneho naprašowanja instituta Forsa, w nadawku nowiny Stern a sćelaka RTL. W Sakskej móhła strona tak 13 procentow a w Durinskej 18 procentow zdobyć. CDU by w Sakskej po naprašowanju z 33 procentami najsylniša strona bywa, na nju slěduje AfD z 30 procentami a BSW. SPD a Zelenym by so ze šěsć procentami poradźiło, dale w krajnym sejmje sobu skutkować, Lěwicy z třomi procentami nic. FDP by samo mjenje hač tři procenty měła. We wobeju krajomaj staj amtěrowacaj ministerskaj prezidentaj wo wjele woblubowanišej hač jeju stronje. Při direktnych wólbach by Michael Kretschmer (CDU) 50 procentow hłosow dóscpěł. Za Jörga Urbana (AfD) by so jenož 14 procentow a za Sabinu Zimmermann (BSW) jeničce dwaj procentaj rozsudźili. Tež w Durinskej by so 42 procentow za Boda Rammelowa (Lěwica) rozsudźiło.

Producent chipow TSMC zasydli so z wulkej twornju w Sakskej

Drježdźany (dpa/SN). Hišće wot noweho projekta přichoda w Sakskej wjele widźeć njeje, ale w přichodnych měsacach so tójšto předewza w Silicon Saxony – tak pomjenuje swobodny stat swoju branšu mikroelektroniki a połwodźakow wokoło Drježdźan. 2027 chce taiwanske předewzaće TSMC zhromadnje z třomi ­partnerami na sewjeru Drježdźan chipy wosebje za awtomobilowu industriju produkować. Po cyłym swěće najwjetši producent siliciumoweje mikroelektroniki přińdźe z tym do Europy. Dźensa mějachu za to symboliski prěni zaryw, na kotrymž wobdźělichu so nimo zwjazkoweho kanclera Olafa Scholza (SPD) a prezidentki komisije EU Ursule von der Leyen tež Budyski krajny rada Udo ­Wićaz (CDU).

Köln (dpa/SN). Ličby branše online-hrow pokazuja na spomaleny rozrost. 2021 powjetši so ličba games-předewzaćow wo 20 procentow na 749, 2023 wu­činješe plus hišće 15 procentow (na 908). Wo­srjedź lěta 2024 bě jich 948 a tak štyri procenty wjace hač hišće lěto do toho. Přistajenych je pola wuwiwanskich studijow a wudawaćelow tuchwilu 12 048 ludźi, štož je tři procenty wjace hač hišće loni. Samsny čas loni wučini rata rozrosta hišće sydom procentow. Wosebje mjeńše studija poněčim zawru. Wjetše zawody su tohorunja potrjechene, ale dawno nic tak jara kaž njewotwisne mjeńše firmy. Cyłkownje pak branša ­online-hrow dale rozrosće: Techniske móžnosće bywaja dale a lěpše a naprašowanje stupa. Ale wunoški lětsa ­prěni raz spaduja. Za čas korony pak su čim razantnišo stupali. Na mjezynarodnych ­wikach maja němske předewzaća jenož mały podźěl. Online-hry, kotrež so w Němskej programěruja, docpěwaja ­ně­hdźe pjeć procentow globalnych wu­noškow. Wot tutych pjeć procentow profituja mjezynarodne firmy ze sydłom w Němskej najbóle.

Korčmarjej z Mannheima njebě wědome, zo je hósć hišće na nuzniku hosćenca. Tuž hosćenc po swjatoku na zwučene wašnje zamkny. Muž, kiž bě wjace hač štwórć hodźiny na hajzlu sedźał, dyrbješe potom hišće wjace hač hodźinu w hosćencu wutrać, policija zdźěli. Dokelž sej žaneje rady njewědźeše, wón nuzowe čisło zazwoni. Přez wokno jeho zastojnicy wuchowachu. Korčmar policistam slubi, zo budźe w přichodźe před zawrjenjom nuzniki přepruwować.

Maće stres w pruwowanskej fazy? Studenća w porynsko-pfalcowskim Koblenzu maja nětko naprawu, z pomocu kotrejež hodźi so stres přewinyć. „Little Joe“ – pedagogiski psyk je specielnje wukubłany. Z nim móža so studowacy zaběrać, hrajkać a jeho wězo tež majkać. Žónka Little Joe zdobom při wažnych terminach přewodźa a wotpinanje zaruča.