Serbšćina we wólbnym boju bě prjedy prašenje zdwórliwosće: CDU je tež serbsce wabiła, byrnjež njetrjebała, wšako su ludźo ju tak a tak wolili. A tehdomniša najwjetša opoziciska strona PDS resp. pozdźišo Lěwica to činješe, najebać to, zo je z tym lědma hłosy přidobyć móhła. W lětušim wólbnym boju wo mandaty w sakskim krajnym ­sejmje je wšo hinak. AfD chce poslednju „čornu kupu w módrym morju“ přepławić a wabi z dale a wjac ryzy serbskimi plakatami. Ničo njeje hižo samozrozumliwe, to su europske wólby pokazali: Čorna kupa je so drjebiła. Najsylnišej přećiwnikaj ministerskeho prezidenta Kretschmera pak staj tuchwilu jeho kultusowy minister a krajny zarjad za šulu a kubłanje. Drama wo serbskej rjadowni w Radworju a delegowanje wjele serbskich wučerjow na němske šule přisporjatej hłosy w Serbach, kotrež praja: Hórje hač nětko z druhimi njebudźe. To je drje riskantne, z warnowanjom před prawicarjemi pak tomu njezadźěwaš, ale z proserbskej politiku. Marcel Brauman

15lětny je w Bremenje busoweho šofera hrał, po měsće jěł a samo pasažěrow wozył. Póndźelu nawječor bě so młodostny busowemu šoferej jako praktikant busoweho předewzaća předstajił, zdźěli policija. Dokelž wědźeše mnoho detailow wo busu, smědźeše šofera přewodźeć. Po kóncu jězby wotsali so šofer, młodostny pak zwosta w busu. Při busowym zastanišću zalězechu samo pasažěrojo do busa. Zo bě wón bus pokradnył, zwěsćichu woprawdźići šoferojo a to policiji zdźělichu. 15lětny je awtist a chcyše z akciju swoju zahoritosć za jězdźidła a techniku pokazać.

Po tym zo njebě so 40lětny po wudźenju w Awstralskej domoj nawróćił, je policija započinała za nim pytać. Namakali su jeho nětko na njewšědnym městnje: W brjuše krokodila. Tón je muža pozdatnje zežrał. Zrudny to kónc wudźenskeje tury.

Serbscy putnicy, kotřiž wobdźělichu so na mjezynarodnym putnikowanju ministrantow do Roma, nawróćichu so zašłu sobotu do Łužicy. Dožiwjene předźěłać, budźe chwilu trać.

Rom/ Róžant (SN/MG). Je sobotu, krótko do jědnaćich. Před hnadownej cyrkwju na putniskim městnje katolskich Serbow přijědźe oranžojty bus. Wulke je čisło 13 na prědnim woknje widźeć. W busu sedźa ministrantki a ministranća kaž tež jich přewodnicy Chróšćanskeje a Wotrowskeje wosady. Woni běchu, runja dalšim někak 50 000 ministrantam z cyłeho swěta, tydźeń dołho w Romje přebywali. Nětko so zaso do domizny nawróća. Zo bě tydźeń w lěćnej horcoće Italskeje dosć napinacy, to je we wobličach wšěch putnikow spóznać. Ale tež cyle wosebity błyšć we wočach.

Někak 67 kilometrow je putniska skupina po Romje běhała, wobdźělnicy rozprawja. Wšitke štyri hłowne putniske cyrkwje su sej wobhladali a so wězo w nich pomodlili, powěda wosadny farar Měrćin Deleńk na dźaknej Božej mši ministrantow njedźelu w Chrósćicach.

Wiesbaden (dpa/SN). Studentki a studenća kaž tež šulerki a šulerjo su loni přerěznje wjace BAföGa dóstali. Podpěra po zwjazkowym zakonju wo spěchowanju wukubłanja – BAföG je přerěznje na 640 eurow wob měsac wučinjał. To su 47 eurow abo wosom procentow wjace hač lěto do toho. Kaž Zwjazkowy statistiski zarjad ze sydłom we Wiesbadenje dale zdźěli, su cyłkowne wudawki nastupajo BAföG wo 14 procentow na 3,4 miliardow eurow rozrostli.

EU wuslědk njepřipóznawa

Brüssel (dpa/SN). Europska unija oficialny wuslědk prezidentskich wólbow we Venezueli njepřipóznawa. EU žada sej dospołne wozjewjenje wólbnych podłožkow. Wólbam njedźelu tydźenja wumjetowachu wobšudnistwa. Najebać to bě wólbny zarjad CNE knježaceho awtori­tarneho prezidenta Nicolása Madura za dobyćerja wuwołał. Rozklučowane rezultaty wobwodow dotal wozjewjene njejsu. Opozicija pak na to pokaza, zo je jich kandidat Edmundo González Urrutia ­jasnje wólby dobył.

Boja so deeskalacije