Frankfurtske lětanišćo zlemili
Biden koncentruje so na zastojnstwo
Washington (dpa/SN). Po swojim cofnjenju z aktualneho wólbneho boja chce so prezident USA Joe Biden cyle na swoje zastojnstwo w Běłym domje koncentrować. „W přichodnych měsacach chcu swoje nadawki jako prezident spjelnić“, rjekny demokrat w swojej wječornej narěči wobydlerstwu kraja. Tajke narěče z běrowa prezidenta su jenož we wuwzaćnych padach z wašnjom. Rozsud Bidena, za zastojnstwo prezidenta hižo dlěje njekandidować, je wusahowaca cezura dobre tři měsacy do wólbow, 5. nowembra.
81lětny bě so swojeje staroby a strowotniskeho stawa dla ćišćej swójskeje strony podwolił a so z wólbneho boja wróćo sćahnył. W narěči rjekny, zo chcył stronu demokratow po tutym puću „zjednoćić“. Iniciatiwu měli nětko młodźi ludźo přewzać, wón rjekny.
Přichodne měsacy chcył dale na tym dźěłać, płaćizny znižić, hospodarstwo wožiwić a wosobinske prawa wobydlerjow zakitować. Dale chce Biden Nato skrućić a ruskemu prezidentej Putinej znjemóžnić, sej Ukrainu přiswojić.
Kijew zwólniwy k rozmołwam
Ukrainski wonkowny minister Kuleba w Chinje – Ruska zdźeržliwa
Kijew/Peking (dpa/SN). Ukrainski prezident Wolodymyr Zelenskyj je w zwisku z jězbu wonkowneho ministra Dmytra Kuleby k zwjazkarjej Ruskeje, Chinje, zwuraznił, zo zhladuje optimistisce na móžne diplomatiske rozrisanje. „Mamy jasny signal, zo China teritorialnu integritu a suwerenitu Ukrainy podpěruje“, Zelenskyj w Kijewje rjekny.
Ukrainski wonkowny minister je tuchwilu w Pekingu, zo by pozicije swojeho kraja a Chiny za diplomatiske rozrisanje we wójnje Ruskeje přećiwo Ukrainje zbližił. Kuleba je w tym zwisku tež zajim Kijewa na direktnych rozmołwach z Ruskej wobkrućił. Dotal su w Moskwje na tajke poskitki zdźeržliwje reagowali.
China je najwažniši zwjazkar Ruskeje. Pekingej připisuja wulki wliw na Moskwu. Zelenskyj chwaleše, zo China dotal swoje přilubjenje dodźerži a Ruskej žane brónje njesćele. Za dalše dopóznaća čaka na nawrót Kuleby.
To a tamne (25.07.24)
Šěsćlětneho syna prosće zabył je muž na awtodróhowym parkowanišću na A 13 pola Radeburga. Policija dyrbješe žałosćace dźěćo z małym barikom tróštować, doniž so nan njenawróći. Tón bě po krótkej přestawce dale jěł a njebě ani pytnył, zo je hólc mjeztym z awta wulězł. Skónčnje móžeštaj nan a syn zhromadnje z jězbu do Berlina pokročować.
Prěni spionažny skandal maja na olympiskich hrach w Parisu, prjedy hač su so hry započinali. Žónske koparske mustwo Neuseelandskeje bě při treningu wospjet trut wuhladało, kotryž žony wobkedźbowaše. Lětacy objekt słušeše kanadskim koparkam, prěnim přećiwnikam neuseelandskich žonow dźensa wječor. Kanada je asistencnu trenarku Jasmine Mander mjeztym domoj pósłała. Trenarka mustwa Bev Priestamnn njebudźe dźensa na kromje hrajnišća stać.
Lěwica: Bilanca wostrózbjaca
Berlin (dpa/SN). 5 000 nowych dźěłowych městnow w zarjadach a slědźenišćach je zwjazkowe knježerstwo we wuhlowych rewěrach připowědźiło. 2 094 z nich je dotal wobsadźenych. To wuchadźa z wotmołwy zwjazkoweho hospodarskeho ministerstwa na naprašowanje Lěwicy w parlamenće. Konkretne planowanja wobsteja tuchwilu za 3 531 městnow. Lěwica ma to za wostrózbjacu bilancu.
Hižo w inwesticiskim zakonju za wuhlowe regiony předchadźaceho knježerstwa je zawjazk zapisany, hač do kónca 2028 znajmjeńša 5 000 nowych, přidatnych dźěłowych městnow w zarjadach abo druhich zarjadnišćach Zwjazka wutworić. Přikład je wotnožka Zwjazkoweho zarjada za hospodarstwo a kontrolu wuwožowanjow w Běłej Wodźe.
„W tutym tempje to ničo njebudźe ,z wustupom z brunicy w najidealnišim padźe hač do 2030‘, kaž ampla to hišće propaguje“, měni parlamentariski jednaćel Lěwicy w zwjazkowym sejmje, Christian Görke. Wón wočakuje, zo stanje so „strukturna politika w rewěrach woprawdźe z šefowej naležnosću zwjazkoweho knježerstwa“.
Zelenskyj chce swójske rakety
Kijew (dpa/SN). Ukrainski prezident Wolodymyr Zelenskyj je přilubił, zo chcyła Ukraina daloko sahace rakety wuwiwać a twarić. Z nimi móhł kraj zepěranišća hłuboko w Ruskej nadběhować, na kotrychž Ruska rakety do směra na Ukrainu startuje. „Nadawk je wobćežny, tola poněčim je nam móžno, swójske rakety zasadźić“, rjekny Zelenskyj w swojim wšědnym widejowym poselstwje. Dotal ma Ruska na polu raketow jasne lěpšiny napřećo Ukrainje. Tole chce Kijew změnić.
Netanjahu rěči w kongresu
Washington (dpa/SN). Israelski ministerski prezident Benjamin Netanjahu chcyše dźensa w kongresu USA porěčeć. Při tym měješe mjez druhim wo Gazasku wójnu hić, kotraž nětko hižo dlěje hač dźewjeć měsac traje. Přiwuzni zawlečenych israelskich zastajencow, kotřiž Netanjahuwa přewodźeja, nadźijeja so rozrisanja. Wčera běchu zastupnicy Židowskich wosadow twarjenje parlamenta nachwilnje wobsadźili. Policija bě jich na to z domu wupokazała.
Zwyša bjezdawkowy podźěl
Wobydlerjo lěsneho protestneho campa njedaloko zawoda awtotwarca ...
Krajny rada wotstupi
Kandidatka žada sej zastojnstwo
Přepytowanja tež w Mnichowje
Mnichow (dpa/SN). W zwisku z racijemi po zakazu Hamburgskeho islamskeho centruma su tež w Mnichowje rumnosće přepytowali. Něhdźe 30 policistow je so dźensa rano do twarjenja podało, w kotrymž je Bayerske islamske zjednoćenstwo zaměstnjene, powěsćernja dpa rozprawja. Policisća sćazachu zamóženstwo zjednoćenstwa a dalše dopokazy skutkowanja. Při tym měrjachu so w prěnim rjedźe na nošaki datow.
Hamburgski islamski centrum a toho wotnožki su dźensa zakazali. W tym zwisku su policisća srjedźišćo zjednoćenstwa w Hamburgu wobsadźili a mošeju, kotraž je znata jako „módra mošeja“, zawrěli. Centrum běchu kónc lońšeho lěta zhromadnje z 54 dalšimi objektami hižo raz přepytowali. Přeslědźili běchu objekty tež w Bayerskej, Berlinje, Hessenskej a Sewjerorynsko-Westfalskej.
Islamski centrum je wažne srjedźišćo propagandy iranskeho režima w Europje. Hamburgski zarjad za wustawoškit jón hižo wjele lěta wobkedźbuje. Stajnje zaso jewja so žadanja, centrum zawrěć.
