Washington (dpa/SN). Ukrainski prezident Wolodymyr Zelenskyj je so USA, Němskej a dalšim čłonskim krajam Nato za planowane zesylnjenje powětroweho škita Ukrainy dźakował. Wón je partneram přewšo dźakowny, zo su zhromadnu deklaraciju na dobro ukrainskeho po­wětroweho zakitowanskeho systema schwalili, to piše na internetnej platformje X. Přidatne systemy pomhaja, ruske truty a rakety zničić a Ukrainjanow lěpje před ruskimi nalětami škitać.

Do toho bě prezident USA Joe Biden na swjedźenskim zarjadowanju k 75lětnemu wobstaću NATO we Washingtonje předewzaće připowědźił. Při tym dźe wo přidatne systemy typa Patriot. Němska a Nižozemska běštej hižo před tydźe­njemi připowědźiłoj, Ukrainje dalšej systemaj přewostajić. Wobkedźbowarjo rěča w tym zwisku wo inscenaciji, dokelž běchu dalše systemy dawno dojednane. Wojerscy fachowcy na to pokazuja, zo je skutkowny powětrowy škit w Ukrainje jenož za metropole móžny, wšako je Ukraina nimale dwójce tak wulka kaž Němska.

Sakska a Čěska staratej so zhromadnje wo swětowe herbstwo

Freiberg (dpa/SN). Ze swjatočnosću w Freibergskej Mikławskej cyrkwi stej Sakska a Čěska minjeny kónc tydźenja róčnicu spožčenja titula swětoweho herbstwa rudnohórskej Montanowej hórniskej kónčinje před pjeć lětami woswjećili. Ministerski prezident Michael Kretschmer (CDU) bě sej w juliju 2019 sam na posedźenje komiteja swětoweho herbstwa do azerbajdźanskeje stolicy Bakuwa dojěł a bě tež na swjatočnym zarjadowanju w Freibergu přitomny.

Próstwu wo přiwzaće bě Sakska swój čas zhromadnje z Čěskej zapodała, wšako wupřestrěwaja so Rudne horiny na němskim a na čěskim boku mjezy. Minjenu wutoru bě Kretschmer zhromadnje ze swojim čěskim kolegu Petrom Fialu wažne městnosće swětoweho herbstwa wopytał a dźěło ludźi wuzběhnył, kotřiž so wo zachowanje herbstwa prócuja.

Po słowach krajneho społnomócnjeneho za naležnosće Serbow w Braniborskej to jeho nadawk zastojnstwa dla njeje, so čłonkam a čłonomaj Serbskeje rady za zdokonjane dźěło dźakować. Najebać to je statny sekretar Tobias Dünow wčera kóždej a kóždemu z nich kwěćel přepo­dał. Kwěćele w serbskich barbach w Podstupimje namakać, je ćežko, wón přizna, tuž je tute w Berlinje kupił. Smějkotanje wubudźi jeho přispomnjenje, zo bychu so za módru barbu kostrjancy wězo lěpje hodźeli. Te pak w kwětkarni njemějachu. Tuž dyrbješe so z wóstami spokojić. Na to předsydka Serbskeje rady, Kathrin Šwjelina, reagowaše. „Wósty su ćernjojte“, wona rjekny, rozumi je jako metafru. Statny sekretar je tuž swój dźak z (wosobinskim) přećom zwjazał: Njech gremij njepopušći njedostatki serbske naležnosće nastupajo pomjenować a na jich rozrisanju wobstawać. Hač maja w radźe tele wašnje připóznaća za nastork, so wo dalšu wólbnu dobu požadać, znate njeje. Axel Arlt

Smjertne powostanki dlěje hač 20 lět zhubjeneho krosnowarja su w peruskich Andach namakali. Drasta a krosnowarska technika turista z USA běchu hišće w porjadku. Muža bě lěta 2002 lawina na horje Nevada Huascarán w sewjernym dźělu kraja na wysokosći 5 200 metrow zhromadnje z dalšimaj krosnowarjomaj zasypała. Prěnjeho zasypaneho běchu před lětomaj namakali. Třeći krosnowar wostanje dale zhubjeny.

Wopiteho a pod wliwom lěkow stejaceho 20lětneho smalerja je policija na Berlinskim Kürfürstendammje lepiła. Młody muž bě zastojnikam ze swojim swojo­raznym wašnjom jězdźenja napadnył. Dokelž na signale policije njereagowaše, policija jeho ze sirenu a módrej swěcu přesćěhowaše. Skónčnje jeho zadźeržachu. Při kontroli so wukopa, zo nima smaler žanu jězbnu dowolnosć.