Washington přihłosuje namjetej ukrainskeho prezidenta Zelenskeho

Washington/Kijew (dpa/SN). USA podpěruja namjet ukrainskeho prezidenta Wolodymyra Zelenskeho, zastupnikow Ruskeje na přichodnu měrowu konferencu w mjeztym dlěje hač dwě lěće trajacej wójnje přeprosyć. „Je to naležnosć Ukrainy, wo tym rozsudźić, hač wotpowědne diplomatiske iniciatiwy pře­wjedźe“, zdźěli rěčnik wonkowneho ministerstwa USA, Matthew Miller, we Washigtonje­. „Podpěrujemy ukrainske knježerstwo.“ Hač je Moskwa na diplomatiskim rozrisanju konflikta scyła zajimowana, Miller njewě. USA su po jeho słowach hižo do wudyrjenja wójny diplomatiske prócowanja přewjedli. Dźensa je kraj najwjetši dodawar brónjow Ukrainje.

Zelenskyj bě žurnalistam w Kijewje rjekł, zo měli so zastupnicy Ruskeje na přichodnej měrowej konferency wobdźělić. To chcedźa na jednanjach w Kataru, w Turkowskej a Kanadźe přihotować. Žro jednanjow je dospołne cofnjenje ruskich wójskow z Ukrainy. Moskwa tole dotal jako swětacuze wotpokazuje.

Prezidenta kolumbiskeho koparskeho zwjazka zajała je policija USA při tumultach wokoło kónčneje hry mjez Argentinskej a Kolumbiskej w Miamiju w Floridźe. Wjace hač 800 zastojnikow bě w stadionje Hard Rock zasadźenych. Hra, kotruž je Argentinska dobyła, započa so dwě hodźinje přepozdźe: Fanojo bjez zastupneho lisćika běchu spytali, so namócnje do stadiona předrěć. Při tym dóńdźe k rozestajenjam z policiju.

Do škleńčanych duri bywšeje kupnicy Galeria Kaufhof w Choćebuzu zrazyła je 61lětna ze swojim awtom. Wočiwidnje měješe žona strowotny problem, policija zdźěla. Awto je wjacore durje personalneho zachoda přerazyło a hakle po někotrych metrach w twarjenju stejo wostało. Šoferku dowjezechu do chorownje. Hewak njeje so nichtó zranił. Město chce kupnicu na měšćanski forum přetwarić.

Hamor (SN). „Carbon Labfactory Sakska“ rěka najnowši projekt w zwisku ze změnu strukturow. Wjace hač 60 milionow eurow spěchowanskich srědkow inwestujetej Sakska a Zwjazk do slědźenskeho centruma za „zelene“ karbonowe niće. Techniska uniwersita w Kamjenicy projekt wědomostnje přewodźuje. W přichodnych lětach chcedźa w tutym inowatiwnym centrumje slědźić, kak móhli so karbonowe niće w přichodźe naslědnišo produkować.

Slědźenska naprawa budźe potom jedna z třoch po cyłym swěće. Jeničce w USA a Awstralskej dotal tajke zarjadnišćo maja. Projekt je dźěl wusměrjenja industrije w srjedźnej Łužicy, po kóncu wudobywanja brunicy. Wšelakore statne institucije su do procesa zwoprawdźenja centruma zapřijate. Doniž so doskónčne dźěło wědomostnikow njezahaji pak hišće někotre lěta traje. Potom ma tójšto atraktiwnych dźěłowych městnow nastawać. Karbonowe niće su wosebje lochka a tola twjerda maćizna. Tute wužiwaja mjez druhim za lětadła, abo tež za wosebje lochke kolesa, kotrež profisportowcy přewšo požadaja.

Berlin (dpa/SN). Wonkowna ministerka Annalena Baerbock chce zhromadne dźěło ze Senegalom a Słonowinowym pobrjohom (Elfenbeinküste) zesylnić, zo by kónčinu před dalšim wosłabjenjom škitała. „Hdyž na zapadźe Afriki hišće wjace krajow do chaosa padnje, njezměje to jenož dramatiske sćěhi za wobydlerjow kónčiny ale wuskutkuje so hnydom na wěstotu Europy“, rjekny politikarka Zelenych do wotlěta do zapadneje Afriku.

Odessa wot raketow trjechena

Odessa (dpa/SN). Njedaloko ukrainskeho přistawneho města Odessy su minjenu nóc wjacore detonacije registrowali. Guwerner wojerskeho regiona Oleh Kiper ludźi namołwješe, w bunkrach wostać, doniž njejsu płomjenja zhašane. Do toho bě ukrainski powětrowy škit zwěsćił zo so wjacore rakety z juhu bliža. Informacije wo škodach njepředležachu. Ruska twjerdźi, zo Ukraina swoje nadpady na Krimu w Odessy planuje a koordinuje.

Tójšto mortwych w šuli