Israel nadpaduje zaměrnje reprezentantow islamistiskich organizacijow

Teheran (dpa/SN). Wukrajny reprezentant islamistiskeje Hamas Ismail Hanija je po informacijach teroristiskeje organizacije při israelskim nadpadźe w iranskej stolicy Teheranje žiwjenje přisadźił. Smjertny nadpad měrješe so na rezidencu Hanije. Ze stron Israela njejsu nadpad dotal hišće komentowali. Rewoluciske gardy Irana porno tomu su smjerć Hanije wobkrućili. Hanija bě najwyši zastupnik Hamas, kotrehož su po zahajenju Gazaskeje wójny morili.

Powěsć wo smjerći Hanije dóńdźe jenož hodźiny po israelskim nadpadźe z lětadłami na nakromnu štwórć libanonskeje stolicy Beiruta. Při tym su po informacijach israelskeje armeje Fuada Schukru morili, wysokeho rozkazowarja milicy Šiitow Hisbollah. Organizacija je z Hamas­ w Gazaskim pasmje wusko zwjazana. Wobaj stej zwjazkarjej Irana.

Double Rolanda Kaisera steji wot minjeneho kónca tydźenja w kabineće wóskowych figurow Mademe Tussauds w Berlinje. 72lětny Kaiser bě widźomnje hnuty, kak perfektnje běchu jeho napodobnili, hač k fałdam w mjezwoču. Na wšěch pjeć hodźin bě Kaiser swój čas sobudźěłaćerjam kabineta z modelom był. Kopiju mjezwoča su w Londonskej dźěłarni zhotowili. Po terminje w Berlinje poda so wón do Drježdźan na jewišćo při Łobju, hdźež tysacy na njeho čakachu.

Z 85 000 wobdźělnikami zahaja dźensa w Schleswigsko-Holstenskim Wackenje festiwal pod hołym njebjom. Zastupne lisćiki běchu před lětom za štyri hodźiny wupředate. Festiwal traje hač do njedźele. Je to najwjetše zarjadowanje heavy-metal hudźby po wšěm swěće. Spektakl zahaja z koncertom dujerskeje kapały Wackenskeje wohnjoweje wobory.

Berlin/Grodk/Zły Komorow (SN/at). Změjemy po kóncu wudobywanja brunicy w Błótach hišće dosć wody? Prašenje zwisuje z wobběhom wody we Łužicy, hdyž klumpy LEAG we wokolinje brunicowych jamow wodu wjace njewotklumpuja. Naležnosć tematizowaše bywši zapósłanc zwjazkoweho sejma dr. Klaus-Peter Schulze z Grodka hižo w času, jako parlamentej hišće přisłušeše.

Dźěłowe zjednoćenstwo „woda“ komunalneho zwjazkarstwa Łužiski kruh prócuje so wo to, puć za přichodne dojednanje zrunać. Sakska, Braniborska a Berlin dyrbja rozrisanje docpěć, hdyž ma woda dale ze žórłow Sprjewje hač do Berlina ćec.

Statny sekretar Stefan Tidow widźi zwjazkowe ministerstwo za wobswět, přirodoškit, nuklearnu wěstotu a škit přetrjebarjow nastupajo prócowanje wo přichodny wobběh wody wěsće na stronje Łužiskeho kruha. To wón na wuměnje z jeho štyrjomi zastupjerjemi minjeny štwórtk w Berlinje wuzběhny. Ministerstwo bě jich na kooperacisku rozmołwu přeprosyło. Wšitko rozsudźacy dypk hladajo na sylniši angažement Zwjazka je mjez druhim njewujasnjene prašenje financowanja.

Hamburg (B/SN). Po podaćach Statista Research Department w Hamburgu běše w lěće 2023 78,6 procentow požadarjow wo azyl muslimojo a kóždy dźesaty křesćan. Kónc meje 2024 bě w najwjetšej skupinje 21,9 procentow požadarjow mjez 18 a 24 lětami, z jeničce 0,7 procentami zastupjeni běchu w tutej skupinje wosoby nad 65 lět.

Muslimscy šulerjo w Sakskej

Drježdźany (B/SN). Wobchad z muslimskimi šulerjemi na zjawnych šulach w Sakskej rjaduje postajenje Ministerstwa za kultus. We wučbje etiki a nabožiny so šulerjam interkulturelna kompetenca sposrědkuje, hdźež so ze zakładami wšelakich nabožinow, tež islama, zaběraja.

Baptisća w Němskej

Hannover (B/SN). Zwjazk ewangelsko-swobodnych wosadow, baptisća a bratrowske wosady, maja něhdźe 82 000 čłonow we 800 wosadach. Z toho je 73 000 baptistow w něhdźe 700 wosadach. Prěnja baptistiska wosada so 1609 w Amsterdamje załoži. Rozdźěl k ewangelskej a katolskej cyrkwi je, zo baptisća dźěći njekřćija, ale młodostnych a dorosćenych.

Apel nošerjow myta