Kuriozne swětowe mišterstwa powětrowych gitarow dobył je Zachary Knowless z Kanady w finskim Oulo. Wón přesadźi so přećiwo 15 konkurentam. Němski wobdźělnik Patrik Culek wobsadźi njedźakowne štwórte městno. Wubědźowanje napodobnjeneho wirtuozneho hraća gitary přewjeduja tam wot lěta 1996. Jenož 2020 a 2021 dyrbjachu festiwal korony dla wotprajić.

Dźiwje huso je so pytajo za picu do bydlenja w Kielu zabłudźiło. Wobsedźer njewědźeše sej žiweje rady a wołaše policiju wo pomoc. Jako zastojnicy přijědźechu, bě huso cyłu kuchnju přeborkało a wotpowědny chaos zawostajiło. Po krótkej honjeńcy po bydlenju móžachu zwěrjo popadnyć a do přikrywy zawalić. Při rěce w nutřkownym měsće je wusadźichu. Tuchwilu hišće prawje njewědźa, kak je huso do bydlenja přišło.

Narěč wyšeho měšćanosty na lětnym přijeću je nimo wuspěchow tež brachi wšědneho dnja wotkryła: Tak nimaja Wojerecy hižo lěta dołho žane srědki za saněrowanje dźěratych chódnikow.

Wojerecy (SN/mb). Wyši měšćanosta Torsten Ruban-Zeh (SPD) je swój slub dodźeržał: „Lětsa budźe wšo hinak“, praješe na spočatku přijeća města Wojerec na kopaće połnej małej žurli Łužiskeje hale. Wulka žurla přetwara dla k dispoziciji njesteješe. A woprawdźe njeběše tón raz narěč Rubana-Zeha najdlěši dypk programa, ale wustup wulkeho chóra Wojerec. Porno lońšemu přijeću, jako dyrbješe ministerski prezident Michael Kretschmer krótkodobneje do Brüssela, běše šef sakskeho knježerstwa lětsa přitomny.

Lipsk (SN). Sakske wustawowe sudnistwo je dźensa rozsudźiło, zo bě wukaz strowotniskeho ministerstwa za čas korony, nahubnik wužiwać, z wustawu swobodneho stata konformny. Z tym wotpokaza sudnistwo pohóršk strony AfD z lěta 2020. Tak mjenowany wukaz wo škiće před koronu wopřiješe mjez druhim wobmjezowanja mjezsobnych kontaktow a dalše rjadowanja. Žadanje za kontrolu wukaza je z tym wotzamknjene.

Žadaja sej anonymny register

Berlin (dpa/SN). Unija je strowotniskeho ministra Karla Lauterbacha namołwjała anonymny register za wosebje ćežke zmylki při lěkowanju zarjadować. Lěkarjo měli móžnosć měć, tajke zmylki anonymnje registrować směć, praji rěčnik za strowotnisko-politiske prašenja frakcije CDU/CSU w zwjazkowym sejmje Tino Sorge. Tak su potrjecheni lěkarjo před stigmatizaciju škitani a móža w přichodźe ze zmylkow druhich wuknyć.

Chce być prezidentka wšěch