Předsydstwo wobkrućili
Na stronskim zjězdźe AfD so wonkownej politice wěnowali
Essen (dpa/SN). Čłonojo strony AfD w Němskej wotměchu swój stronski zjězd minjeny kónc tydźenja w Essenje. Nimo wólbow předsydow, kotrajž buštaj z Alice Weidel a Tinom Chrupallu znowa wobkrućenaj, zaběrachu so sobustawojo tohorunja z wonkownej politiku. Mjez druhim delegaća rozsudźichu, ze strony ID (identita a demokratija) – zwjazka prawicarskich europskich stronow – wustupić. Nimo AfD přisłuša zwjazkej francoska Rassemblement National (RN), italska Lega kaž tež Swobodna strona Awstriskeje (FPÖ) jako jedna z wodźacych čłonow. AfD bě ID hakle loni w septembru přistupiła. Kónc meje bě ID-frakcija w Europskim parlamenće zhromadne dźěło z AfD po dwělomnych wuprajenjach načolneho kandidata Maximiliana Kraha k nacionalsocialistiskej SS zakónčiła. Z toho časa je AfD w Europskim parlamenće bjez frakcije.
Fronće w Francoskej
Kwota niša
To a tamne (01.07.24)
Dwulětny hólčec z durinskeho Sonneberga je so skradźu w nocy na pućowanje podał. Bosy a jenož z pjeluškami zdrasćeny je w nocy na sobotu wokoło 2 hodź. rano z bydlenja twochnył a so po parku města wuchodźował. Kedźbliwa pasantka je dźěćo wuhladała a je narěčała. 23lětna wobstara dźěle drasty a hólčka policiji přepoda, kotraž za staršimaj pytaše – najprjedy bjez wuspěcha. Zawěsće staj so staršej rano chětro wustróžiłoj, jako prózdne łožo nańdźeštaj. Wokoło 7.30 hodź. so mać pola policije přizjewi.
Karjera šefa policije jendźelskeho hrabinstwa Northamptonshire je nimo. Nick Adderley je łžał, komisija zańdźeny pjatk rozsudźi. Mjez druhim je zastojnik naspomnił, zo je w lěće 1982 we wójnje přećiwo Argentinskej słužił – při tym bě Adderley tehdy hakle 15 lět stary.
Scholz gratuluje nowej trójce
Brüssel (dpa/SN). Zwjazkowy kancler Olaf Scholz (SPD) je wot Europskeje rady namjetowanej nowej trójce na čole EU gratulował. Do toho běchu statni a knježerstwowi šefojo čłonskich statow EU politikarku CDU Ursulu von der Leyen za dalšu dobu w zastojnstwje prezidentki komisije EU nominowali. Bywši portugalski ministerski prezident António Costa budźe nowy prezident Europskeje rady. Estiska ministerka prezidentka Kaja Kallas budźe nowa społnomócnjena EU za wonkowne naležnosće.
Žane jednanja z Georgiskej
Brüssel (dpa/SN). Europska unija je proces přistupa Georgiskeje k EU najprjedy raz přetorhnyła. Přičina je aktualny kurs politiskeho nawodnistwa w stolicy Tiflisu, statni a knježerstwowi šefojo zdźěla. W dokumenće zwuraznja starosć Europskeje rady hladajo na najnowše wuwiće w Georgiskej. Konkretnje mjenuja razniše zakonje knježerstwa za kontrolu ciwilneje towaršnosće. To je wosebje na njedobro tam skutkowacych wukrajnych organizacijow.
Wukrajne zasadźenje podlěšene
Do zahajenja lětušeje mjeztym 111. Tour de France su wčera w ...
Wustupowanje Bidena kopolace
Atlanta/Washington (dpa/SN). Prezident USA Joe Biden njeje w prěnim telewizijnym duelu přećiwo swojemu wužadarjej Donaldej Trumpej z chabłacym wustupom woprawdźe přeswědčić móhł. Mnozy skerje dwěluja, hač so 81lětny demokrat za zastojnstwo woprawdźe hodźi.
Za čas 90 mjeńšin trajaceho rozestajenja so Biden stajnje zaso kopoleše a rěčeše njejasnje. Wobkedźbowarjo mějachu wospjet swoju lubu nuzu, jemu sćěhować. Porno tomu wustupowaše Trump agresiwnje, wospjetujo stare wumjetowanja a njelutowaše ze łžemi. 78lětny Trump chce w januaru 2025 znowa jako prezident do Běłeho domu zaćahnyć.
Biden nadběhowaše Trumpa z njewšědnje raznymi słowami, mjenujo jeho „skiwlaka z moralku stareho psa“. Woprašowanje sćelaka CNN wunjese, zo je Trump po měnjenju 67 procentow ludźi duel jasnje dobył.
Koalicija žada sej wujasnjenje
Berlin (dpa/SN). Amplowa koalicija SPD, Zelenych a FDP žada sej hladajo na rizika wjacorych miliardow eurow dale wujasnjenje w naležnosći skazanych nahubnikow za čas koronakrizy. „Zasadźenje dawkowych srědkow wjacorych miliardow eurow za njepřewidne zrěčenja ma so předźěłać“, rjekny městopředsyda frakcije Zelenych Andreas Audretsch wčera w aktualnej hodźinje zwjazkoweho sejma w Berlinje. Tehdyši minister za strowotnistwo Jens Spahn (CDU) bě hladajo na mnóstwo skazanych nahubnikow dospołnje přehnawał, wón rjekny. Audretsch rěčeše wo „sobu najwjetšim skandalu brojenja dawkowych pjenjez“ w stawiznach zwjazkoweje republiki.
Spahn swoje postupowanje w lěće 2020 zakitowaše, pokazawši na nuznje trěbnu škitnu drastu w strowotnistwje. „Dyrbjachmy we wulkej nuzy rozsudźić.“ Połoženje bě chaotiske, Spahn přizna. „W druhich krajach pak bě runje tak.“
Mjenje wustupow
EU chce Ukrainu dale podpěrować
Brüssel (dpa/SN). Europska unija je z Ukrainu hladajo na wójnu Ruskeje dojednanje nastupajo wěstotnu kooperaciju a dołhodobnu podpěru wotzamknyła. Dokument su ukrainski prezident Wolodymyr Zelenskyj, prezidentka komisije EU Ursula von der Leyen a społnomócnjeny EU za wonkowne naležnosće Charles Michel wčera na wjerškowym zetkanju EU w Brüsselu podpisali.
Zwjazkowy kancler Olaf Scholz (SPD) mjenowaše zrěčenje z Ukrainu „znamjo solidarity w ćežkich časach“. Zelenskyj so dźakowaše, prošeše pak zdobom wo dalšu pomoc krajow EU za spěšne dodawanje bróni a municije.
W dojednanju rěka: „Europska unija je rozsudźena, Ukrainje a jeje wobydlerjam dale tak dołho a intensiwnje kaž je trjeba, politisce, financnje, hospodarsce, humanitarnje, wojersce a diplomatisce pomhać.“ Brüssel chce Ukrainje přilubjenu pomoc 50 miliardow eurow tak spěšnje kaž móžno přewostajić.
