Israelscy zastajency hišće žiwi?
Beirut (dpa/SN). Dlěje hač wosom měsacow po nadpadźe na Israel islamistiska Hamas po swójskich informacijach njewě, kelko zawlečenych zastajencow w Gazaskim pasmje je hišće žiwych. „Njewěm to. Nichtó to njewě“, rjekny rěčnik Hamas Osama Hamdan sćelakej CNN.
Minjenu sobotu běchu israelscy wojacy při wulkim wojerskim zasadźenju štyrjoch zastajencow z rukow Hamas wuswobodźili a při tym – po informacijach Hamas – 274 Palestinjanow morili.
W Israelu dochadźa hižo měsacy k demonstracijam. Ludźo žadaja sej wot knježerstwa Benjamina Netanjahuwa wjetšu prócu, zo móhli so zastajency zaso nawróćić. Tući hraja tež wažnu rólu při indirektnych jednanjach mjez Israelom a Hamas wo přiměrje. Prezident USA Joe Biden namjetuje nachwilny přiměr, zo móhli žónskich a staršich zastajencow pušćić. Při wšěm z tym liča, zo njeje najwjetši dźěl zwostawacych 120 israelskich zastajencow hižo žiwych.
Dobyće snadne, ale zbožowne
Pólska Wobydlerska koalicija so při europskich wólbach přesadźiła
Waršawa. Wólby Europskeho parlamenta minjenu njedźelu běchu w Pólskej w prěnim rjedźe zasadne wothłosowanje: na dobro noweho knježerstwa Wobydlerskeje koalicije (KO) ministerskeho prezidenta Donalda Tuska abo přećiwo njemu na dobro bywšeho knježerstwa PiS z Jarosławom Kaczyńskim na čole. Na kóncu bě jasne, zo je Tusk wothłosowanje dobył, byrnjež přewšo snadnje. 37,06 procentow Polakow bě kandidatow koalicije woliło, za zastupnikow PiS wupraji so 36,16 procentow. Njesměrnje zbožowny prezentowaše so Tusk zhromadnje z Waršawskim wyšim měšćanostu Rafałom Trzaskowskim po wozjewjenju wólbnych wuslědkow. Kaczyński porno tomu je spytał poražku relatiwizować, wšako pobrachowaše jemu na kóncu woprawdźe „jeničce“ 100 000 hłosow.
Karta wólbnych wokrjesow Pólskeje jasnje pokazuje, zo je kraj politisce dale pačeny: Zapad je kruće w rukach Europje přichileneje liberalneje Wobydlerskeje koalicije. Wuchodne kónčiny steja za narodno-konserwatiwnej PiS.
Wudospołnjenje
To a tamne (14.06.24)
Njerozsudnu koparsku hru Němskeje přećiwo Šotiskej dźensa wječor w Mnichowje wěsći mórska lawica Hilla w Lipšćanskim zwěrjencu. Lawica hraješe sej z bulomaj w němskich a šotiskich barbach we wodowym basenku a suny wobaj do wrotow, najprjedy šotiski, po tym tež němski. To rěka, zo Šotiska prěnje wrota třěli a Němska pozdźišo wuruna.
Z kolesom hač k najsewjernišemu dypkej Europy w Norwegskej dojěłoj stej sotře ze Smolinow Traina a Phelia Müller wčera rano. Na wšěch 2 650 kilometrow stej žonje zmištrowałoj, na kolesu a zdźěla pěši. Startowałoj běštej w Schleswigsko-Holsteinskej na specialnym kolesu za zbrašenych. Na nim móžeštej sotře w starobje 22 a 24 lět zhromadnje sedźeć. Wšědnje jědźeštej něhdźe 80 kilometrow, wšelake wotrězki zmištrowaštej pěši. Za čaru trjebaštej cyłkownje 35 dnjow.
Wuhotowanje parka klimje přiměrić
Wochozy (AK/SN). Změna klimy kóždeho potrjechja. Přiměrjenju změnje klimy móže kóždy wobydler přinošować, dokelž zamóže angažement wobydlerjow wjele zahibać. To běše poselstwo schadźowanja pod hesłom „Zjawne parki klimje přichilene wuhotować“ tele dny we Wochozach. Wjace hač 30 wobdźělnikow z wobłukow wědomosć, komuny, zarjady, lěsnistwa, towarstwow a wobydlerstwa bě na zarjadowanje w parku błudźenkow přišło. Přeprosyło bě spěchowanske towarstwo Łužiski park błudźenkow Wochozy. Žurnalist sćelaka mdr a fachowc za zahrody Jens Haentzschel zeńdźenje moderěrowaše.
Scholz kanclerski kandidat?
Berlin (dpa/SN). Předsydka SPD Saskia Esken a zakitowanski minister Boris Pistorius mataj zwjazkoweho kanclera Olafa Scholza najebać wólbny debakl we wólbach Europskeho parlamenta za kmaneho kanclerskeho kandidata za wólby zwjazkoweho sejma 2025. Lěta 2021 bě SPD tež tohodla dobyła, dokelž ludźo do nawjedowanskich kmanosćow Scholza wěrjachu, rjekny Esken nowinarjam. „Tuta dowěra je so minjenej lěće stajnje zaso jako prawa wopokazała.“
Žaruja wo morjenu holcu
Döbeln (dpa/SN). Po namócnej smjerći dźewjećlětneje Valerije w srjedźosakskim Döbelnje pytaja dale za skućićelom. Ćežišćo přepytowanjow je socialny wobswět holcy. Jeje ćěło běchu wutoru popołdnju w lěsu južnje města ze 24 000 wobydlerjemi namakali. Dźewjećlětna bě wot 3. unija zhubjena. Podhlad na seksualny njeskutk dotal nimaja. Za kónc tydźenja předwidźany měšćanski swjedźeń w Döbelnje su wotprajili. Město toho planuja žarowansku Božu słužbu.
Zwjazkowy sejm bafög zwyšił
W argentinskej stolicy Buenosu Airesu je wčera k raznym rozestajenjam ...
G 7 schadźuja so w Italskej
Bari (dpa/SN). Skupina sydom najwjetšich industrijnych krajow swěta je so dźensa na swój kóždolětny wjeršk zešła. Italska ministerska prezidentka Giorgia Meloni bě statnych a knježerstwowych šefow do Apuliskeje na juhu kraja přeprosyła. Wobdźělene su USA, Kanada, Japanska, Wulka Britaniska, Francoska, Němska a EU. Najwažniše temy su wójnje w Ukrainje a na Bliskim wuchodźe. Ukrainski prezident Wolodymyr Zelenskyj je jako hósć přeprošeny.
Na zetkanju chcedźa wo dalšej wojerskej a hospodarskej pomocy za wot Ruskeje nadpadnjenu Ukrainu wuradźować. EU bě hižo wobzamknyła, sćazane ruske statne zamóženstwo za Ukrainu wužiwać a tak Kijewej kredit 50 miliardow dolarow přewostajić.
Jednanja haćene
China kritizuje cła za elektroawta
Brüssel/Peking (dpa/SN). Zwjazk awtomobiloweje industrije němskeje (VDA) kritizuje hroženje komisije EU, sej za elektroawta ze Chiny přichodnje wysoke cła žadać. Prezidentka zwjazka Hildegard Müller ma wotedawki za zadźěwk globalnemu zhromadnemu dźěłu. Z tym přiběra strach swět wopřijacych wikowanskich rozestajenjow. Cła na chinske awta europskim awtotwarcam scyła njepomhaja, Müller rjekny. Hač dyrbja chinscy awtotwarcy cło hač do 38 procentow woprawdźe płaćić, wot toho wotwisuje, hač z Chinu w jednanjach druhe rozrisanje w konflikće njenamakaja.
China připowědźene chłostanske cła EU za elektroawta raznje kritizuje a hrozy zdobom z přećiwnymi naprawami. Wikowanske ministerstwo w Pekingu EU wumjetuje, zo rjećazy dodawanja tworow haći. „Europska unija dźerži w jednej ruce chorhoj zeleneho wuwića, w druhej pak retl protekcionizma“, rěčnik ministerstwa rjekny. China namołwja EU, swój wopačny kurs změnić a hospodarske napjatosće po puću dialoga rozrisać.
