To a tamne (10.06.24)
Najwjetšu Božu słužbu motorskich su wčera w Hamburgu swjećili. Něhdźe 3 000 ludźi ze swojimi mašinami su wosrjedź města zličili. Minjene lěta bě wjace hac 20 000 wobdźělnikow přišło. Lětsa pak dyrbjachu twarskich dźěłow na awtodróze 7 dla tradicionalny korso motorskich po měsće wotprajić. Tuž bě mjenje ludźi přišło. Božu słužbu motorskich swjeća w Hamburgu wot 1980tych lět.
Ćeknjena kruwa je w badensko-württembergskim Balingenje za kolesowarjom hač na toho ležownosć běžała. Jako muž do pincy dźěše, kruwa jemu tež po schodach slědowaše. Přiwołana policija zwěsći, zo steji zwěrjo přeco hišće w pincy. Do toho bě wona po šulskim dworje błudźiła. Wobsedźer móžeše howjado přeswědčić, pincu wopušćić a na připowěšak zalězć. Načinjenu škodu w pincy trochuja na wjacore sta eurow.
Wulka woda žně zničiła
Mnichow (dpa/SN). Wulka woda je mnohim ratarjam žně zničiła. Wosebje zlě je połoženje w dźělach hornjeje a delnjeje Bayerskeje, zdźěli Markus Drexler, rěčnik bayerskeho ratarskeho zwjazka. W někotrych ratarskich zawodach steji hižo wjacore dny wša płonina pod wodu. Tole je za běrnjace a kukuricowe rostliny zahubne, „dokelž prosće zhnija“. Tež łuki a žitnišća, kotrež je woda zatłóčiła, njejsu zwjetša wjace wužiwajomne.
Steinmeier w Mannheimje
Mannheim (dpa/SN). Zwjazkoweho prezidenta Franka-Waltera Steinmeiera wočakowachu dźensa na mjeńšinu žarowanja na Mannheimskim hłownym torhošću. Tydźeń po smjertnym nadpadźe na policista chcyše Steinmeier tam kwěćel połožić. Popołdnju chcyše AfD na samsnym městnje přećiwo islamizmej demonstrować. Runočasnje planuje Antifa přećiwnu demonstraciju. 25lětny Afghana bě tam minjeny pjatk do wjacorych ludźi kłół a 29lětneho policista morił.
USA žadaja sej wujasnjenje
Składnostnje 25lětneho wobstaća noweho Serbskeho zakonja Sakskeje ...
Mjeza cannabisa postajena
Berlin (dpa/SN). Dwaj měsacaj po dźělnym legalizowanju cannabisa je zwjazkowy sejm wjele diskutowany zakoń hišće raz precizował. Wčera wječor wobzamknjene rjadowanja poćahuja so na šoferow awtow a na towarstwa, kotrež konop plahuja. Při tym dźe wo to, wulkim plantažam zadźěwać.
W nadróžnym wobchadźe płaći přichodnje za cannabis za wodźidłom mjeza 3,5 nanogramow wopojneho srědka THC, štož wotpowěduje 0,2 promilam alkohola. Měšenje cannabisa a alkohola je zakazane. Za započatkarjow w nadróžnym wobchadźe wostanje cannabis dospołnje tabu. W februaru bě zwjazkowy sejm zakoń k dźělnemu legalizowanju cannabisa wobzamknył. W Zwjazkowej radźe žadachu sej wjacore zwjazkowe kraje na to dokładniše rjadowanja.
Namjezne kontrole móžne
Francoske „Mirage“ do Ukrainy
Caen (dpa/SN). Na swojim wopyće w Francoskej składnostnje róčnicy nadběha aliěrowanych w Normandiji před 80 lětami su ukrainskemu prezidentej Wolodymyrej Zelenskemu francoske bojowe lětadła typa Mirage přilubili. Tole je francoski prezident Emmanuel Macron w rozmołwje z telewizijnymaj sćelakomaj TV1 a France 2 připowědźił. Lětadła maja Ukrainje zmóžnić, swój teritorij a powětrowy rum škitać. W leću chcedźa ukrainskich pilotow wukubłać. Nimo toho ukrainsku brigadu 4 500 wojakow w Francoskej trenuja.
Na prašenje, hač chcyła Francoska wojerskich wukubłarjow do Ukrainy pósłać, so Macron wuwiny. Ukraina Francosku wo tajku misiju prosy, štož njeby tež žana eskalacija była, wón rjekny. „Dźěłamy wusko z partnerami a rozsudźimy tajke prašenja kolektiwnje jako koalicija.“
Bojowe lětadła Mirage njesłušeja wjace k najmodernišim. Francoska chce je poněčim z nowymi mašinami typa Rafale narunać. Mirage su spočatk 80tych twarić započeli. W 90tych lětach słušeše Mirage k najmodernišim wjacezaměrowym bojowym lětadłam.
Horcy bój do wólbow EU
Wšitke politiske strony Pólskeje wo hłosy wolerjow wojuja
Waršawa. Chětro horca politiska nalada knježi tuchwilu w Pólskej – wólbow Europskeho parlamenta dla. Wo městna w najwyšim zastupnistwje EU prócuje so zajutřišim, njedźelu, na wšěch 1 020 kandidatow. Politikarjo spytaja wolerjow poslednje dny do wólbow mobilizować. Tak je ministerski prezident Donald Tusk minjenu wutoru swojich přiwisnikow do Waršawy zwołał. Něhdźe 25 000 přichwatanych dopominaše wón na historiski datum před 35 lětami. Tehdy bě sej dźěłarnistwo Solidarność z Lechom Wałęsu na čole prěnje zdźěla swobodne wólby wuwojowało a je jasnje dobyło. Mjeztym 80lětny Wałęsa, kiž bě samo prezident kraja, přitomnych wutoru naležnje prošeše, kandidatow knježaceje Wobydlerskeje platformy Donalda Tuska wolić. Jenož wón je kmany kraj přichodne lěta spušćomnje nawjedować. „Mějach jenož pjeć lět jako prezident“, Wałęsa zwurazni, nutrnje prošo, „dajće jemu znajmjeńša wosom lět, potajkim dwě wólbnej dobje.“
