Danska po wrotowym festiwalu we wosmifinalu
Kopenhagen (kh/SN). Danska je so tola hišće za koło najlěpšich šěsnaćoch na europskich mišterstwach (EM) kwalifikowała, a to po dramje w prěnjej koparskej hrě wokoło Christiana Eriksena a po poražkomaj 0:1 přećiwo Finskej a 1:2 přećiwo Belgiskej. Přećiwo Ruskej su Danojo z njewšědnej energiju wčera wojowali a 4:1 dobyli. Rjekojo dnja běchu Kasper Damsgaard (38.), Yussuf Poulsen (59.), Andeas Christensen (80.) a Joakim Maehle (82.). Za Rusku móžeše jeničce Artjom Dźjuba (70.) z dwělomnym pokutnym kopom na 1:2 skrótšić.
W paralelnej hrě mjez Finskej a Belgiskej wupadaše dołho za tym, zo poradźi so Finskej snano hišće sensacija, tola krótko do kónčneje fazy hry trjechi dotal najlěpši Fin samowrota. Po róžku z lěweje strony zhłójčkowa Belgiski škitar Thomas Vermaelen bul na aluminij. Wottam skoči hrajny nastroj wrotarjej Lukášej Hrádeckemu njezbožownje na ruku a do wrotow (74.). Krótko po tym Romelu Lukaku na 2:0 (81.) zwyši, a hra bě rozsudźena.
Hrajne zjednoćenstwo Pančicy-Worklecy rozpušćene
Hrajne zjednoćenstwa nastawaja, hdyž jednotliwe mustwa dosć personala nimaja. Tež pola Pančičanskich a Worklečanskich wolejbulistkow to před třomi/štyrjomi lětami tak bě, a tak wustupowachu wone tři sezony jako hrajne zjednoćenstwo. Nětko pak je wone rozpušćene. Wo tym sportowa redakcija Serbskich Nowin hižo rozprawješe. Jurij Bjeńš je hišće někotre dalše informacije zezběrał.
Štož běchu 2018 załožili, so lětsa zaso skónči. Žónske wolejbulowe zjednoćenstwo ST Marijineje hwězdy a Viktorije Worklecy nastupi w nowej hrajnej dobje jenož hišće jako Viktoria Worklecy a Viktoria Worklecy II. Wobě mustwje budźetej w samsnej stafli hrać. Z kelko cyłkami budźe wona scyła nastajena, dotal hišće jasne njeje. Žro hrajerkow něhdyšeho hrajneho zjednoćenstwa pak wostanje, kaž nam Tereza Wićazowa přeradźi: „Nimale wšitke hrajerki su pola nas wostali a nimo toho přińdu hišće někotre wolejbulistki ze swójskeho dorosta. To změjemy rjanu měšeńcu.“
Zajimcy za kopańcu dale witani
Rakečanske sportowe towarstwa poskića hač do 30. junija dźěćom a młodostnym probowy trening. Přizjewjenja su dale pod móžne.
Lětnikaj 2013 a 2014, to je młodźina F, zetkatej so stajnje srjedu wot 17 do 18.30 hodź., lětnikaj 2011 a 2012 (młodźina E) štwórtk wot 17 do 18.30 hodź., lětnikaj 2009 a 2010 (młodźina D) wutoru wot 17 do 18.30 hodź. a młodźinje C (lětnikaj 2007 a 2008), kaž tež młodźina B (2005 a 2006), stajnje srjedu wot 17 do 18.30 hodź. Jan Hrjehor
Hiobowa powěsć do treningoweho zazběha
Prjedy hač podachu so koparjo regionalneho ligista FC Energije Choćebuz wčera tydźenja na hrajnišćo, zo bychu prěni raz w přihotach na sezonu 2021/2022 w Choćebuskim Lok-stadionje trenowali, dźěše wosebita powěsć wot hrajerja k hrajerjej abo wot žurnalista k žurnalistej.
Nowy nutřkowny škitar Shawn Kauter, kiž bu hakle njedawno angažowany, bě zamołwitym koparskeho kluba telefonisce zdźělił, zo nětko tola za Energiju hrać njebudźe. „Za nas je jasne, zo ma Kauter z nami płaćiwe dźěłowe zrěčenje, a na tym wobstawamy. Jeli pak so něchtó ze šěsćcyfrowej pjenježnej sumu přizjewi a hrajerja wotkupi, potom hodźi so z nami rěčeć. Zadźerženje knjeza Kautera jasnje pokazuja, zo so tajki muž z tajkim jednanjom k nam njehodźi. Ale tež bjez njeho změjemy za nowu sezonu mustwo z porjadnym charakterom“, rjekny prezident FCE Sebastian Lemke.
Testowu partiju wysoko dobyli
ST Gogolow
– FC Energija Choćebuz 0:9 (0:2)
Zestawa hosći w prěnim połčasu: Stahl – Hofmann, Hildebrandt, Koch, Borgmann, Putze, Eisenhuth, Erlbeck, Kremer, Geisler, Harz
w 2. połčasu: Scholz – Hofmann, Rahn, Hildebrandt, Böhmert, Eisenhuth, Bustamante, Kujović, Hasse, Harz, Kremer
Slěd wrotow: 0:1 Harz (26.), 0:2 a 0:3 Hildebrandt (35./52.), 0:4 Bustamante (59.), 0:5 Kremer (62. jědnatka), 0:6 Rahn (69.), 0:7 Eisenhuth (73.), 0:8 Kremer (89.), 0:9 Harz (90.)
Italska dominuje při EM skupinu A
Tajny faworit Turkowska hižo na dompuću a Waliziska najebać poražki we wosmifinalu
Rom (kh/SN). Italske narodne koparske mustwo muži je tež swoju třeću skupinsku hru při europskich koparskich mišterstwach (EM) dobyło. Dźakowano suwerenemu předstajenju přesadźi so wubranka Italskeje z 1:0 přećiwo Waliziskej. Z tym je dale na puću k historiskemu rekordej. Před 53 lětami běchu Italčenjo mjenujcy posledni raz EM titul dobyli. Z 30 hrami zasobu bjez poražki zastajichu Italčenjo swójski rekord z 30tych lět pod trenarskej legendu Vittorio Pozzo.
Italska před rekordom
Widźał, słyšał, napisał (21.06.21)
„Bastard Ronaldo!“, steješe sobotu wječor krótko po 1:0 za Portugalsku na šmóratku spřećeleneje Pražanki w Praze. Wona bě sej wjacorych hosći z tu- a wukraja do stolicy Čěskeje na narodniny a tež na hladanje kopańcy přeprosyła. Wotpósłar spočatnje mjenowaneje SMS pak tam na zbožo njebě, tak zo wotběža wječor dosć měrnje.
Spodźiwne, kak so někotři fanojo do hrow europskich mišterstwow (EM) stopnjuja a njewěcownje partije komentuja. Jako docpě Ronaldo za Portugalsku nawjedowanje, pokazowaše časnik hakle 15. min. wot dohromady 90. Móžeš so tola najprjedy hišće raz měrnje do křesła sydnyć a wočaknyć, kak so duel dale wuwije. „Štóž 1:0 nawjeduje, přěhraje“, rěkaše mjenujcy stajnje pola nas dźěći, jako na wjesnych kopanišćach za bulom honjachmy. Runje mjenowane prajidmo je sobotu tež přitrjechiło, wšako přěhra Portugalska po nawjedowanju 1:0 z 2:4.
Sport (18.06.21)
Na a we wodźe sportować
Wodoskijowa připrawa Wake and Beach w Brězowce (Halbendorf) a přisłušacy wodowy park za kupanje stej dźensa hišće hač do 19 hodź. wotewrjenej. Jutře a njedźelu „sněhakuja“ po wodźe Brězowskeho jězora wot 14 hodź. kóždej dwě hodźinje. Na internetnej stronje www.wakeboard-halbendorf.de je tež wuwidźeć, kotre naprawy hygieny płaća.
Prěnje přećelske hry nastajene
W teritoriju Zapadołužiskeho koparskeho zwjazka steja po dołhim času w hrajnych lisćinach zaso prěnje přihotowanske a přećelske hry.
19.06. 10:30 Wojerowski FC –
SV Wacker (młodźina B)
19.06. 11:00 Wojerowski FC –
Kulow (młodźina D)
20.06. 11:30 Biskopičanske KT –
FC Lößnitz (mužojo)
27.06. 11:00 Biskopičanske KT –
1. FFC Fortuna Drježdźany (žony)
Žabjacy běh na třoch dnjach
Sportowe towarstwo Běła-Cunnersdorf přewjedźe lětsa tak mjenowany Žabjacy běh wot 25. do 27. junija. Tele zarjadowanje bu dowolene, dokelž wubědźuja so běharki a běharjo na třoch dnjach město na jednym. Zamołwići su wjacore startowe koridory postajili:
25.06. 15:00–20:30 hodź.
26.06. 06:00–11:30 hodź.
26.06. 15:00–20:30 hodź.
27.06. 06:00–08:30 hodź.
27.06. 09:00–11:00 hodź. walking
Duel wo postup do wyšeje ligi
Nižozemska wubranka hižo we wosmifinalu
Amsterdam (kh/SN). Nižozemska narodna koparska wubranka je wčera při swojim comebacku na wulkim jewišću tež swoju druhu hru europskich koparskich mišterstwow (EM) dobyła a prěnje městno w skupinje C přewzała. Nawjedowani wot trenarja Franka de Boera podachu so jeho chowancy po wothwizdanju na čestne koło po Amsterdam-arenje. Ze sylnej ofensiwnej kopańcu je team „Oranje“ dočasnje wosmifinale EM docpěł. Nižozemjenjo běchu so z 2:0 suwerenje přećiwo Awstriskej přesadźili. Tak zdobywaja sej sydom lět po poslednim wobdźělenju na wulkim koparskim turněrje dale a bóle rólu faworita. Memphis Depay přetwori w prěnim połčasu jědnatku, a Denzel Dumfries třěli w druhim połčasu 2:0.
ST Marijina hwězda přeproša na jubilejny běh
Poprawom chcyše Pančičanske sportowe towarstwo lětsa swój stoty jubilej porjadnje woswjećić. Wězo bychu tež sportowali. Wosebje integraciski sportowy swjedźeń by za wobydlerjow domu zbrašenych w klóštrje zaso rjany wjeršk był. Aktualneje situacije korony dla pak su so za alternatiwu rozsudźili a přeprošuja wšitkich na digitalny jubilejny běh. Tam móžeće sam/a abo jako mustwo nastupić. Přizjewić maš/maće so prošu z mejlku na .
Chwile běh přewjesć je wot 28. junija do 3. julija 2021. Kóžda sportowča/kóždy sportowc abo kóžde mustwo indiwiduelnje běh na samowuzwolenej distancy absolwuje. Wažne pak je wužiwać někajku fitnesowu app abo něšto podobneho, zo maće dopokaz wo času a kilometrach.
Mjenowane daty pósćelće potom hač do 3. julija (na přikład jako foto) ze swojim mjenom abo mjenom mustwa zaso jako mejlku na naspomnjenu adresu. Wosoby a mustwa z najdlěšimi naběhanymi distancami budu mytowane a wuslědki wozjewjene. Jurij Bjeńš
