Łužiske liški Běła Woda – EV Lands­hut 1:3 (1:1, 0:0, 0:2)

Běše to hra, kotruž hnydom wjacore lodo­hokejowe mudrosće podšmórnje: „Hdyž je prědku nječiniš, dóstanješ je jónu zady“, „Jedna dobra třećina je přemało“, „Štóž mjenje zmylkow wora, tón dobudźe“ a „ Wotliči so na kóncu“. A tak dobychu hosćo z Bayerskeje w liščej jamje 3:1, byrnjež to jara snadna hra z dwěmaj wulkotnymaj wrotarjomaj była. Liški dominowachu w prěnich 18 mjeńšinach, nažel pak je po 12:4 třělwach na wrota přemało wuskočiło. Coach Corey Neilson pósła tónkróć swój druhi rjad na spočatku do hry, w nadźiji, zo móža prěnju formaciju z Landshuta eliminěrować a zo móže potom swójska primarna formacija puk hnydom husćišo do přećiwniskich wrotow třělić. Před wrotami běchu Liški přesłabe, ale hosćo dale a sylniši. A tak njesteješe kónc prěnjeje třećiny 4:0 abo 5:0 za domjacych, ale jenož 1:1.

W druhich 20 mjeńšinach dósta wrotowa sirena na woběmaj bokomaj přestawku. To zaležeše na tym, zo lodohokejisća wobeju cyłkow prawje njeměrjachu, najčasćišo pak staj wobaj wrotarjej gumijowu tačel wurjadnje dźeržałoj.

Łužiske liški Běła Woda – Bietigheim Steelers 6:0 (4:0, 1:0, 1:0)

Hladajo na posledni lodohokejowy wuslědk Běłowodźanskich liškow w lěće 2020 bě to wjac hač jednostronska hra. A woprawdźe, Liški tež jara derje wu­stupowachu, a tři dypki běchu na kóždy pad zasłužene. Hladajo pak na statistiku třělwow na wrota (34:36) bě to chětro wurunana partija.

Hnydom wot prěnjeje sekundy dźěše tam a sem, wobě mustwje wuhrawaštej sej jara dobre składnosće. Jenički rozdźěl tónraz bě, zo domjacy swoje šansy wu­žiwachu, hosćo pak ze swojimi zdźěla zwjeršnje wobchadźachu. Najčasćišo pak je wrotar Łužiskich liškow Tobias An­cicka cyle prawje stał. Wón bě z wotstawkom muž dnja, a to z krutej murju před swójskimi wrotami. Hižo w prěnjej třećinje hosćićeljo 4:0 nawjedowachu. Feodor Boiarchinov (5.), Jonathon Martin (7.), Ludwig Nirschl (9.) a Kale Kerbashian (12.) zapisachu so do lisćiny třělcow. Fabian Dietz w srjedźnej třećinje a znowa Kerbashian w poslednim wotrězku hry postaraštaj so wo kónčny wuslědk.

Kassel Huskies – Łužiske liški ­Běła Woda 5:1 (2:0; 2:0; 1:1)

Wot wšeho spočatka běše to druhi dźeń hód jara jednostronska lodohokejowa hra. Domjacy wot prěnjeje do poslednjeje mjeńšiny nadběhowachu. Tuž je poražka 1:5 z wida hosći samo hišće snadna.

Po 11 mjeńšinach suny domjacy nadběhowar puk wot módreje linije­ nimo dweju škitarjow wrotarjej Mac Carruthej mjez nohomaj do saka. Jenič­ku prawu šansu za Liški w prěnjej třećinje měješe Kale Kerbashian w powerplayju, tola jeho pospyt njebě wuspěšny. Jako bě domjacy cyłk runje zaso dospołny, zwyši tón na 2:0. Z pjeć metrow trjechi hrajer z Kassela samlutki před wrotami do čorneho.

Druhi wotrězk bě najprjedy poměrnje wurunany. Samo powerplay lodowych psow Łužiske liški přetrachu. Tola hnydom po nim su hosćo špatnje wuměnili, štož wužichu Kasselčenjo k 3:0. Tři dobre składnosće Liškow domjacy wrotar na to derje wotwobara, runje tak Carruth štyri wulke na tamnym boku. Tola 23 se­kun­dow do druheje sireny tola hišće raz puk w jeho wrotach ležeše. Dobry pospyt z distancy wón hišće wotwobara, druhi pospyt pak sedźeše.

Wulka překwapjenka nimale dospołnje wupadnjene sportowe hibanje wokoło hód a Noweho lěta njebě. Ale doma sedźo abo na kolesu do pedalow teptajo sym sej minjene dny hakle tak prawje wuwědomił, kelko sportowych zarjadowanjow je w tym času wupadnyć dyrbjało a hišće wupadnje. Tak na přikład tež dwaj dnjej do patoržicy mjeztym tradicionalny nócny wolejbulowy turněr serbskeje a němskeje młodźiny w Pančicach-Kukowje. Hižo w lěću běchu so zamołwići za turněr młodźinskeho towarstwa Pawk wjednistwo Serbskeho Sokoła prašeli, kak wone nachwatanje 38. sokołskeho wolejbuloweho turněra wo pokal Domowiny planuje, a što rěči přećiwo přewjedźenju. Tón bě mjenujcy za 16. meju w sportowym kalendrje zapisany. Hač do dźensnišeho pak njeje so pandemije dla nachwatać hodźał. Tež wo pokal Pawka njejsu so 22. decembra wubědźować směli.