Kulowminatije cup dobyli
Na lětušim, mjeztym hižo 11. zymskim Kulow-cupje we wjacezaměrowej hali w Kulowje mějachu koparjo a přihladowarjo zaso wjele wjesela. Dokelž bě klub Kulow Section, młodźinski klub United Clubs of Kulow, loni zymski halowy koparski turněr dobył, smědźeše wón lětuše wurisanje wuhotować. Na nim wobdźělichu so mustwa Koćina/Kulow, Zelena garda, Wyša šula Kulow, Flames of Pils, Gut Kickers, młodźina z Němcow, Kulowminatije kaž tež Kulow Section.
Hrało je so w dwěmaj staflomaj ze stajnje štyrjomi teamami. Zestawa mustwow bě 1:4, kóžda partija traješe 12 mjeńšinow. Po skupinskej fazy sćěhowaštej połfinalnej hrě, po tym zaměstnjenske duele, małe finale kaž tež kónčna hra. Moderator Phillip Schwabe wjedźeše po programje a tež mytowanje dobyćerjow nawjedowaše. Překwapjacy bě wukon mustwa Wyšeje šule Kulow, kotrež wudoby sej 3. městno. Dobyćerjo běchu na kóncu Kulowminatije.
Měnjenja wo Kulow-cupje:
Energija načolne městno zhubiła
1. FC Saarbrücken –
Energija Choćebuz 1:1 (0:1)
Zestawa FC Energije Choćebuz: Funk – Rorig, Awortwie-Grant, Campulka, Borgmann (81. Moustfa), Michelbrink (90. + 5 Manu), Ciğerci, Hannemann (58. Guwara), Boziaris (58. Pelivan), Thiele, Engelhardt (90. + 5 Butler)
Mustwo FC Energije Choćebuz bě so zašły štwórtk na wonkownu jězbu podało. Přinjesło pak je jemu to sobotu jenož jedyn dypk, a to z tójšto zbožom. Posaarčenjo, kotrymž hrozy zestup, mějachu dotalneho načolnika 3. ligi nimale stajnje pod kontrolu. Z poł ducenta dobrych šansow pak jenož jednu wužichu. Choćebuske wrota nastachu do přestawki po wulkotnej kombinaciji, jako dóńdźe bul přez Erika Engelhardta a Tolcayja Ciğercija k centralnje sobu běžacemu Moritzej Hannemannej, kotryž suwerenje přetwori. Tež w druhim połčasu dominowachu hosćićeljo. Jenož štwórć hodźiny běchu hosćo z Łužicy runohódny přećiwnik.
Dokelž přesćěhowar Verl w samsnym času přećiwo Mannheimej 5:2 doby, Choćebuženjo swoju načolnu poziciju přisadźichu. Georg Zielonkowski
Pozitiwne wuwiće Sokołow trenarja zwjesela
Ralbičan Krystof Gloxyn je ze swojim wašnjom jedyn z najemocionalnišich trenarjow wokrjesneje wyšeje ligi. Kóžde mustwo a kóždy sudnik jeho mjeztym znaje. Dosć wuspěšnje je 35lětny ze swojim mustwom do noweje hrajneje doby startował a prěnju połseriju zmištrował. Jurjej Bjeńšej je přeradźił, čehodla su delanscy koparjo tuchwilu tak wuspěšni.
Pohladajmoj najprjedy raz na spočatk sezony: Kak spokojom sy z přihotami Sokołow na nowu sezonu był?
Přihoty běchu wulkotne a wězo trochu spodźiwne, wšako nadobo wjacore stare zajacy kaž Pětr Domaška, Tomaš Rawš abo tež Andy Schultz w kabinje njesedźachu. Bě pak stajnje tójšto hrajerjow na treningu a na hrach a tuž móžachmy mnoho nazwučować.
W štyrjoch hrach sće sej w startowej fazy dźesać dypkow wuwojowali, w pokalu dwójce dobyli a derby w Chrósćicach 3:1 za sebje rozsudźili. Wjele lěpje poprawom startować njemóžeš.
Skupina 47 šulerkow a šulerjow wosmeho lětnika Wyšeje šule Slepo ...
Widźał,słyšał, napisał (19.01.26)
Awtor dźensa
Elias Bětka
Lindsey Vonn je wróćo. Nic mjelčo a nic skedźbliwje, ale přewšo wótře. Při tym bě poprawom hižo wšitko jasne: karjera zakónčena, kolenje skóncowanej, status legendy manifestowany. Pjeć lět bě oficialnje kónc. To bě dosć chwile, rozsud doskónčnje doskónčny sčinić. Tola za 41lětnu US-Američanku bě tale přestawka po wšěm zdaću jenož trochu dlěše wodychnjenje, a wona rozsudźi so za ćělny kaž mentalny nowostart.
Sport (16.01.26)
Choćebuženjo w Saarbrückenje
Dźensa wječor twori hra Regensburg přećiwo Ingolstadtej w 3. koparskej lize zazběh do druheje połserije. Jutře nastupi nazymski mišter FC Energija Choćebuz přećiwo 1. FC Saarbrückenej, kiž steji w pincy tabulki.
16.01. 19:00 Jahn Regensburg –
FC Ingolstadt 04
17.01. 14:00 1. FC Saarbrücken –
FC Energija Choćebuz
17.01. 14:00 Hansa Rostock –
FC Rudne horiny Aue
Tři mustwa Viktorije na parkeće
We wobwodnej lize dyrbi druhe wolejbulowe mustwo muži Sportoweho towarstwa Worklecy jutře do Zhorjelca. Tam hraje wone wot dwěmaj přećiwo dotal njeporaženym Zhorjelčanam. Pomoc hrajerjow prěnjeho mustwa Worklečenjo dóstać njebudu, ći su mjenujcy w Pirnje prašani. Tam wočakuje serbske mustwo načolnika Sakskeje klasy. Hladajo na tabulku změja Worklečanki we wobwodnej lize Wuchodosakska lóši nadawk. Pjaty tabulki nastupi w měsće přećiwo předposlednjemu.
17.01. 14:00 CVJM Zhorjelc –
Viktoria Worklecy II (m)
17.01. 14:00 Pirna-Copitz –
Viktoria Worklecy (m)
17.01. 14:00 MSV Budyšin 04 II –
Viktoria Worklecy (ž)
RB-supercup WFV
Zymske kuzło wonka, koparske kuzło w hali
Zymske poměry na dróhach njejsu zahoritosć za kopańcu w Hornjej Łužicy minjenu sobotu zlemić móhli. Sportowa jednotka Njebjelčicy bě mjeztym štwórty raz halowy koparski turněr starobneje klasy młodźiny E (U 10/U 11) zarjadowała. Tójšto přihladowarjow chcyše tute mocyměrjenje we Worklečanskej sportowni dožiwić. Na tribunje wutwori so tuž rjana kulisa za hrajerjow z wokolnych serbskich towarstwow na hrajnišću. Cyłkownje wosom mustwow z Chrósćic, Ralbic, Pančic-Kukowa, Radworja a wot hosćićelskeho towarstwa z Njebjelčic bě přeprošenje sćěhowało.
Hižo po zahwizdanju prěnjeje hry w 10 hodź. bě pytnyć, zo młode talenty na parkeće nikomu ničo darić nochcedźa. W napjatych, ale stajnje fairnych duelach wojowachu wo kóždy bul. Hry dohladowachu třo Njebjelčanscy dorostowi sudnicy Maksimilian Hojer, Pius Čornak a Metod Pawlik. Mjeztym zo Křesćan Bejmak jako halowy rěčnik turněr přewodźeše, postarachu so starši Njebjelčanskich dorostowych koparjow z wulkim angažementom wo pohosćenje wopytowarjow.
Kónc tydźenja bjez dypkow
EHC Freiburg –
Łužiske lodohokejowe liški
2:1 (1:1, 0:0, 1:0)
Łužiske lodohokejowe liški su mustwu EHC Freiburg pjatk snadnje z 1:2 podleželi. Hosćićeljo partiju spěšnje a agresiwnje zahajichu. Hižo w 2. min. trjechi Tomas Schwamberger po dobytym bullyju 1:0 za Freiburg. Z hrajerjom wjac na lodźe docpěchu liški krótko po tym wurunanje. Na zakładźe widejoweho dopokaza pak sudnicy wrota njepřipóznachu.
Freiburgscy dale efektiwnje hrajny natwar liškow mylachu. W 10. min. zwrěšći Kilian Kühnhauser swobodnje před Anthonyjom Morronom. Porno tomu Georgiy Saakyan w 11. min. 1:1 wuruna. Z powerplayjemi na woběmaj bokomaj wuwi so po tym wurunana partija.
W druhej třećinje wosta Lennard Nieleck z burskim trikom na Patriku Červeným wisajo. Dalše šansy přez Toma Knoblocha a Lennarda Nielecka Liški njewužichu. W 37. min. parěrowaše Anthony Morrone penalty Eera Elo. W prěnjej třećinje bě Běłowodźan Clarke Breitkreuz zranjenja dla wupadnył, w druhim wotrězku zrani so tež hišće Eric Hjorth.
Serbski gymnazij zastupuje wokrjes
Po tym zo bě sej wolejbulowe mustwo hólcow U16 Serbskeho gymnazija Budyšin spočatk nowembra we wokrjesnym finalu w Biskopicach prěnje městno wubědźiło, so tole tež mustwu U14 poradźi. Škoda, zo mějachu jeničce Biskopičanow jako přećiwnikow. Wšitke sadźby a z tym tež hry su šulerjo SGB jasnje 3:0 dobyli. Tuž wobdźěla so wšitke tři mustwa tutón měsac na regionalnym finalu.
Na wobrazu hólčeho mustwa U16 zady stejo wotlěwa (naprawo): Filip Korch, Kilian Henich, Luca Herrmann, Tino Korch; ležo: Józef Bobka, Ben Šmit
Na wobrazu mustwa U14 zady stejo wotlěwa: Benjamin Katzer, Anton Jais, Metod Pawlik, Tadej Jakšt; prědku wotlěwa: Katharina Wasenerec, Tereza Maćijec, Paulina Šibšikec, Lea-Lucian Wjacławkec Foto: Gabriela Jendrewscyna
Požadany pokal znowa dobyli
41. sokołski wolejbulowy turněr wo pokal Domowiny
15 wolejbulowych cyłkow staj serbskaj Sokołaj Jan Hrjehor a Tomaš Suchy minjenu sobotu w Radworju w sportowni Slaviji na 41. sokołski turněr wo pokal Domowiny witałoj. To běchu štyri cyłki wjac hač na turněrje loni na samsnym městnje. Spočatki wubědźowanja při wysokim saku sahaja do lěta 1983, jako běchu tři wučerske mustwa w Pančicach-Kukowje prěni raz wo pokal Domowiny wojowali. W lětomaj 2004 a 2005 bě so stajnje 27 mustwow w Radworju wubědźowało, štož bě rekord wobdźělnikow. Wot 2006 do 2016 pak pólscy wolejbulisća z Tokarnje, wučerjo Biskopskeho gymnazija Varnsdorf a čěski cyłk Sokol Filipov jara woblubowane wurisanje wobohaćichu. Najhusćišo – mjenujcy šěsć króć – su je dotal sportowcy z Pólskeje dobyli.
