Jendźelska koparska wubranka je w dramatiskim połfinalu přećiwo hosćićelej Awstralskej zaćah do kónčneje hry swětoweho mišterstwa kopańcy žonow zdokonjała. Hrajerka Sam Kerr njezamó to scyła zapřimnyć. Njewěriwje steješe wona w Australia-stadionje w Sydneyju na trawniku, wobdata wot swojich toho­runja zrudnych sobuhrajerkow a nad 75 000 zdźěla płakacych fanow na tribunach. 29lětna bě wulki star poł­finala žónskeje WM mjez Awstralskej a Jendźelskej, dobry wukónc pak za nju a mustwo njewu­skoči. Jendźelska swjećeše a ma nětko přećiwo Španiskej šansu, so po lońšim titulu na europskich mišterstwach prěni króć ze swětowym mištrom stać.

Wiegmanowa serija dale dźe. „Smy w finalu, to je njewěrjomne. Začuwa so nimale tak, jako bychmy hižo dobyli“, praji trenarka Jendźelskeje Sarina Wiegman, kotraž steji štwórty króć za sobu na swětowych a europskich mišterstwach w finalu. „Smy hromadźe dźerželi, plan přewjedli a wón je fungował. Awstralčanki běchu jara dobre, woni su w turněrje rostli a je ćežko, přećiwo nim dobyć. Ale my smy to zdokonjeli. Njewěrjomnje, je kaž w bajce.“

ST Ćisk – ST Swjata Marijina hwězda 3:2 (1:2)

Zestawa hosći: P. Cyž – J. Ladewig, K. Pakoßnick, B. Zynda, J. Clausen, P. Schmidt (46. M. Eldor), Ch. Cyž, R. Cyž, Fe. Langer (46. P. Seiler), A. Eldor, J. Pakoßnick

Španiska koparska wubranka je wčera w Aucklandźe prěni króć finale swětoweho mišterstwa žonow docpěła. W połfinalu poradźi so po turbulentnej kónčnej fazy snadny 2:1 wuspěch přećiwo Šwedskej, tež dźakowano zbožownej ručce ­trenarja Jorge Vildy. Pola Skandinawičankow je so porno tomu połfinalny trawma wospjetował.

Jako wothwizda brazilska sudnica Edina Alves partiju krótko do dźesaćich po třoch pózdnich wrotach, wyskachu Juhoeuropjanki bjez přestaća. Dotal najwjetši wuspěch španiskeje „Selección“ měješe so před 43 217 přihladowarjemi we wupředatym Eden Parku porjadnje woswjećić. Jenož jědnaće měsacow po tym, zo wotwobara španiski koparski zwjazk zběžk 15 narodnych hrajerkow přećiwo trenarjej, steji mustwo krótko před dobyćom titula. Koparski trón je jenož hišće jedne dobyće zdaleny. Njedźelu w dwanaćich měri so Španiska w Sydneyju pak z ko-hosćićelkami z Awstralskeje abo z europskimi mišterkami z Jendźelskeje.