Alpinske sněhakowanje

Gmejna Załom zarjaduje zajutřišim, 29. januara, mišterstwa alpinskeho sněhakowanja za sponsorow a firmy ze Za­łomja, Wjernarjec a Hołbina. To budźe wjeršk wubědźowanskeho kalendra tamnišeho sněhakowarskeho kluba. Dźakowano podpěrje nadregionalnych spon­sorow a firmow móžachu Załomski sně­hakowarski areal w zašłymaj lětomaj rekonstruować­ a powjetšić. Njedźelne mi­šterstwa započnu so w 11 hodź.

Młodźina A do F so wubědźuje

Sportowe towarstwo 1922 Radwor přewjedźe tónle kónc tydźenja hnydom wjacore halowe koparske turněry: dźensa wot 19 hodź. w sportowni Budyskeje Daimleroweje šule turněr młodźiny A, sobotu a njedźelu přez cyły dźeń w Ra­dworskej hali turněry młodźinow F, E, D, C a B. Jutře wot 9 do 13 hodź. je to turněr młodźiny F, wot 14 do 18 hodź. młodźiny E a wot 19 do 23 hodź. młodźiny B. Za­jutřišim, njedźelu,­ wot 9 do 13 hodź. nastupi starobna klasa D a wot 14 do 18 hodź. młodźina C.

Volleyballisća mocy měrja

Hdyž druhe dźěći tučasnje sankuja, sněhakuja abo so po lodźe smykaja, honi koparski dorost za bulom – a to nutřka. Minjenu njedźelu přewjedźechu w Kamjencu kónčne hry wo halowe wokrjesne mišterstwa Zapadołužiskeho koparskeho zwjazka (WFV) w starobnej skupinje młodźina F. Za finale najmłódšich koparjow bě so šěsć z dohromady 42 přizjewjenych mustwow skwalifikowało: KT Ottendorf-Okrilla 05, Biskopičanske KT 08, Jednota Kamjenc, Wojerowski FC, ST Kinspork/Łužnica a ST 1922 Radwor jako jenički serbski cyłk. Kóždy hraješe přećiwo kóždemu, a to přeco dźesać mjeńšin. Turněr dobyli su koparjo z Kinsporka/Łužnicy. Radworčenjo wobsadźichu 2. městno a wjeselachu so nad pokalom a slěbrom.

kónčna tabulka

1. ST Kinspork/Łužnica   5 8:0 13

2. ST 1922 Radwor   5 8:4 10

3. KT Ottendorf-Okrilla   5 5:3 10

4. Biskopičanske KT   5 3:4 4

5. Jednota Kamjenc   5 1:5 4

6. Wojerowski FC   5 1:10 1

Antonija Wjeselic

Składnostnje 14. buloweje nocy móžeše sportowe towarstwo Natwar Němske Pazlicy prěni raz Kamjenskeho wyšeho měšćanostu Rolanda Dantza w hali při Kamjenskim lětanišću witać a k tomu tež hišće tójšto přeprošenych sponsorow. Tradiciski turněr wobradźi něhdźe 60 přihladowarjam napjate koparske chłóšćenki z wosom wobdźělenymi mustwami. Po wjele lětach bě tež zaso Jednota Kamjenc mjez nimi. We 18 hrach widźachu wopytowarjo 65 wrotow. We woběmaj staflomaj běchu hry hač do kónca chětro napjate, a konstelacija w tabulkomaj so z kóždej hru měnješe.

Volleyballisća Serbskeho gymnazija Budyšin (SGB) zaručichu sej we Wojerecach regionalne finale we wubědźowanju „Młodźina trenuje za olympiju“ w najstaršej šulerskej starobnej skupinje (10. do 13. lětnik) złoto, a to přećiwo Lessingowemu gymnazijej Kamjenc a Powołanskošulskemu centrumej Zhorjelc stajnje z dobyćom 3:2.

Po nimale štyrihodźinskim napjatym boju při wysokim saku skakaše sydom zbožownych hólcow SGB w kruhu a wołaše wótře „dobyće, hej, hej, dobyće“. Kajki to grandiozny wukónc za pjeć dwanatkarjow-volleyballistow we wobłuku šulskich wubědźowanjow našeho kraja.