SJ Chrósćicy
– ST Fortuna Trjebin 2:0 (0:0)
Zestawa domjacych: Králíček – Pöpel, Cyž, Sentivan, Šafář, Schulze (58. Teichmann), Runt (18. Domaška), Młynk (80. Bětnar), Žur, Věchet, Henčl
Po tym zo bu hra koparjow Chróšćanskeje SJ přećiwo Hornjemu krajej Sprjewja minjeny tydźeń špatnych wuměnjenjow dla wotprajena, nastupichu woni wčera doma přećiwo Fortunje z Trjebina. Mustwo bě trenar Pavel Runt na wjacorych pozicijach přestajił. Za kapitana Tomaša Domašku, kiž bě so hakle pozdźišo mustwu přidružił, započa Žur. Tež Matti Bětnar je hru najprjedy raz z ławki sćěhował. Wobě mustwje startowaštej pomału. Město hrajnych stafetow třělachu bul skerje daloko ze srjedźneho pola. Hižo po dwaceći mjeńšinach běše hrajny dźeń za Pavela Runta skónčeny, kiž dyrbješe so naćehnjenja muskulatury w nadkolenje dla wuměnić. Jeničke šansy wudachu so w prěnim połčasu za domjacych. Po něhdźe poł hodźinje pokaza sudnik na jědnatku. Simon Žur bu do toho w šěsnatce połoženy. Jeho kolega w nadběhu Radim Věchet pak njezamó přetworić. Jenož něšto mjeńšin pozdźišo prasny hłójčkowany bul Petra Šafářa na žerdź.
