Tež prěnje koparske mustwo Radworskeho ST běše w zymskim treningowym lěhwje, a to w čěskim Bedřichovje. Tam chcychu so trěbnych mocow za druhu połseriju nasrěbać. Trenar Pětr Bejmak bě sej wužadacy, ale wotměnjawy program wumyslił.

Pjatk wječor zahaji so lěhwo pod wuběrnymi wuměnjenjemi z prěnim treningom na kumštnym trawniku w Liberecu. Po tym podachu so koparjo do hotela na zhromadnu wječer. Nazajtra rano w sedmich, hišće do snědanje, steješe prěni krótki běh na planje. Po snědani sněhakowachu sportowcy z běžkami na dołhich čarach. Trenar Bejmak bě sej za to napinacu, ale zdobom rjanu turu po něhdźe 25 kilometrach wupytał. Wulki dźěl čary dračowachu so Radworčenjo horu horje, a słónco smaleše jim na chribjet. W mjeńšich přestawkach wabješe jich słódki čaj, a we wjetšej přestawce sydaše wobjed w hosćencu. Wočerstwjenje kiwaše po nawróće w hotelu, hdźež bě sawna přihotowana. Po zhromadnej wječeri nastajichu so wobdźělnicy hišće raz do Libereca na halowy trening. Po dwuhodźinskim zwučowanju dźěše zaso do hotela, hdźež dachu wječor w zhromadnym kruhu wuklinčeć.