SG Frankenthal

– SJ Njebjelčicy 3:0 (1:0)

Zestawa hosći: Hahn – Zeller, Pawlik, Haška, Hrjehor, Lejnart (82. Janca), Kral, Hanuza, Korjeńk (72. Hoelzel), Hommel, Šołta (63. Čornak)

W Frankentalu njeje so koparjam Njebjelčanskeje SJ wospjet poradźiło dypkować. Najskerje bě w jich hłójčkach hišće euforija ze zašłeho wuspěcha abo blokada twjerdeho hrajnišća dla, kotrež pak bě w porjadnym stawje. Hosćićelscy hrajerjo běchu hibićiwši, spěšniši při bulu a koncentrowaniši w dwubojach. Handrij Korjeńk drje so w 10. min. na prawym křidle derje přesadźi, ale sadźi kulowatu kožu nimo wrotow. Krótko po tym postaji sudnik wólny kop za domjacych, a wótrje třěleny bul zhłójčkowa nadběhowar njedźeržomnje k 1:0 do saka (13.). Do přestawki spytachu Njebjelčenjo wurunać, ale tu so zaso pokaza, zo bě přećiwnik přeco spěšnje při mužu a tak natwar hry myleše. Nimo toho je přez cyły čas rumy w srjedźnym polu wuske dźeržał. Tak akcije Roberta Lejnarta w šěsnatce (28.), Pawla Hrjehorja na prawej stronje (32.) a Korjeńka (41.) bohužel ničo njewunjesechu.