SJ Chrósćicy – LSV Hory 1:1 (1:1)
Zestawa domjacych: Králíček – Cyž, Hrdlitschka, Dórnik, M. Zahrodnik, Sentivan, Runt, Věchet, Młynk, Henčl, L. Zahrodnik
Swoju prěnju testowu hru w zymskej přestawce mějachu koparjo Chróšćanskeje SJ w Kamjencu na kumštnym trawniku přećiwo cyłkej LSV Hory. Přećiwnik hraje we wokrjesnej wyšej lize. Přihladowarjo widźachu klasisku přihotowansku hru. Za Chróšćanow bě to prěni test, do toho běchu jenož dwójce trenowali. Tak bě cyle logiske, zo dyrbjachu so najprjedy raz do hry namakać. Hosćo z Horow běchu hižo relatiwnje derje zahraći, wšako běchu hižo tři tydźenje w treningu.
Prěnju šansu, wrota docpěć, pak mějachu Chróšćenjo w 10. min. Michał Młynk kopny po dołhej přihrawce bul nisko do centruma šěsnatki. Tam bě Radim Věchet swobodny a bul do saka prasny. Hosćo mějachu wosebje po standardach někotre składnosće. Wurunanje pak docpěchu po konteru. W natwarje zhubichu domjacy bul, Horjenjo so k wrotam předrěchu a z pasom Králíčeka w klětce wuhrachu. Tak steješe w 32. min. 1:1.