We wobwodnej blidotenisowej klasy měješe TTV Kulow přećiwo ST Łazej II domjacu lěpšinu. Z jasnym dobyćom 11:4 je ju tež połnje wužił. Najlěpšej Kulowčanaj běštaj bratraj Křesćan a Michał Měškank z optimalnymi 2,5 dypkami. Tež Matijas Bart, Jens-Peter Meier a Norbert Měškank, wšitcy z dwěmaj dypkomaj, pokazachu dobry wukon. Jeničce Pětr Měškank wosta bjez dypka.
W prěnjej wokrjesnej lize dyrbješe blidotenisowa šestka DJK Konjecy k načolnej hrě pola TuS Gersdorfa II nastupić a podleža tam 5:9. Poražka bě bolostna, ale z Michałom Elstnerom a Andrejom Čórlichom hnydom dwaj wažnaj hrajerjej wupadnyštaj. Maćij Kokla njebě tohorunja fit, dokelž ma problemy z kolenom. Dierk Šewc (1,5) a Alojs Čóška (1,5) běštaj najlěpšej swojeho mustwa. Dietmar Hrjehor doby za Konjecy jedyn dypk, Pětr Bejma a Maćij Kokla dyrbještaj so z poł dypkom spokojić.
