„A wšědnje strowi bobak!“. Tuta sada z filma ze samsnym mjenom trjechi situaciju prěnjeho wolejbuloweho mustwa mužow ST Viktorije Worklecy chětro dokładnje, přetož njeje to prěni króć, zo njepomhachu wosebite regule Worklečanskim wolejbulistam při postupje abo zachowanju klasy. Hižo 2011 postupichu jako wicemišter do sakskeje klasy, dokelž prěni, VfB Zhorjelc, postup cofny. 2020 postupichu Viktorianorojo jako jedne z třoch mustwow, dokelž bu sezona dla Covid-19-epidemije přetorhnjena. W slědowacymaj hrajnymaj dobomaj bě tohorunja Corona za to zamołwita, zo wšitke mustwa we wotpowědnych ligach wostachu. Nětko pak běchu Worklečanscy mužojo po „přerosćenej“ sezonje 22/23 před třomi měsacami doskónčnje zestupili. Doskónčnje? Po dypkach haj, ale tam wšak maja hišće mjenowane wosebite regule. W „play-down“ kole sakskeje ligi namakachu so na kóncu z mustwomaj Póst Drježdźany a Motor Mickten dwě towarstwje na zestupnych městnach, kotrejuž druhe mustwa hač dotal w sakskej klasy hraještej.