„Citius, altius, fortius-spěšnišo, wyše, sylnišo“ – je moto olympiskich hrow našeho časa. Oficialnje citowane bu wone na olympiskich hrach 1924 w Parisu. Wo slědźe tutych třoch słowow su rozdźělne informacije. Při­wšěm móžemy snano z toho wuchadźeć, zo njech stajnje najlěpši dobudźe! Zajimawa pak je tež stawiznička wo dalšim citaće olympiskich hrow, w kotrymž rěka: „Pódla być je wšitko!“ Tu so poprawne olympiske moto runjewon znapře­ćiwja. Njeńdźe wo wobdźělenje na hrach k powšitkownej zabawje, ale wo bój wo najlěpše wuslědki, dać swoje najlěpše! Nětko pak dosć wšeje teorije a stawi­znow olympiskich hesłow.

Zymske olympiske hry w Južnej Koreji su zakónčene. Dožiwili smy wulkotny sportowy podawk z někotrejžkuli překwapjenku, ze zwrěšćenjom jasnych faworitow a z překwapjacymi, njewočakowanymi dobyćerjemi. Na kóncu bě Norwegska najwuspěšniši kraj ze 14 złotymi, 14 slěbornymi a jědnaće bronzowymi medaljemi.