Serbskosć wulku rólu hraje

wutora, 27. měrca 2018
artikl hódnoćić
(0 )

Pod hesłom „Žiwe herbstwo, pomjezne a zetkawanske rumy“ wuradźowaše w Njebjelčanskej „Bjesadźe“ minjenu sobotu wjac hač sto zastupnikow sakskich komunow na regionalnej konferency krajneho zwjazka Sakski domi­znoškit wo wuwiću wjesnych rumow. Jan Kral je so z hosćićelom konferency, Njebjelčanskim wjesnjanostu Tomašom Čornakom (CDU), rozmołwjał.

Što bě hłowny zaměr konferency?

T. Čornak: Chcychmy sej wuwědomić, kak měli so wjesne rumy Hornjeje Łužicy, hladajo na tradicije a herbstwo, přichodnje wuwić. Wažne při tym je, stajnje znowa wuzběhować wosebitosć a jónkrótnosć kónčiny.

Bě připad, zo wotmě so konferenca w Njebjelčicach, abo što bě rozsudne ju w serbskej wokolinje wotměć?

T. Čornak: Jedna z jednaćelkow zwjazka přebywaše před pjeć lětami w Njebjelčicach a bě wo gmejnje a wokolinje zahorjena. Tak je swoje zaćišće předsydstwu předstajiła, a zwjazk rozsudźi so konferencu jónu na wsy wotměć. Za wobsah a temu so Njebjelčicy jako serbska gmejna Hornjeje Łužicy derje hodźachu.

Sće móhli tež na serbske wosebitosće w gmejnje a regionje skedźbnić?

T. Čornak: To bě tema sama wot so předpodała. Dźěše wo jónkrótnosće a wo­sebitosće Hornjeje Łužicy a kak měli je přichodnje wobkedźbować. Při tym hraja serbskosć, serbska kultura a tradicije wulku rólu. Dźěći w narodnej drasće su hosći z chlěbom a selu witali. Njebjelčanske holcy su serbske pěsnje zanjesli. Tež Serbski institut a Serbski muzej stej wobdźělnikam konferency serbski narod předstajiłoj. Informaciske stejnišćo z knihami je wobdźělnikow runje tak wabiło, kaž móžnosć, pospytać so w jejkadebjenju.

Kajki bě wothłós mjez wobdźělnikami na wjes­ a gmejnu Njebjelčicy?

T. Čornak: Wobdźělnicy konferency su so w Njebjelčicach woprawdźe derje čuli. Wjes a gmejna z jeju wobydlerjemi kaž tež organizacija a wutrobna atmosfera su so jim lubili. Myslu sej, zo smy znowa zamóhli za serbsku kulturu a tradicije wabić. Mnozy běchu prěni raz pola nas a dóstachu tak nastork, zaso jónu přijěć. Hižo jutry chcedźa wjacori składnosć za to­ wužiwać. Wutrobny dźak!

wozjewjene w: Rozmołwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND