Marco Schulze bu spočatk oktobra jako nawoda policajskeho rewěra w Kamjencu do zastojnstwa powołany. Z tym je tež za serbske gmejny zamołwity. Stefan Šmit je so z nowym šefom Kamjenskeje policije rozmołwjał.

Knježe Schulze, měsac sće nětko w zastojnstwje. Kajki Waš započatk bě?

Lěpši hač sym sej jón předstajił (so směje). Sym woprawdźe jara spokojom. Mam tu jara dobry team wokoło sebje, wažu sej přećelnosć a nazhonjenja swojich koleginow a kolegow. Zdobom je to prěni raz, zo sym na kraju a nic kaž dotal w městach zasadźeny. A haj, njemóžu dotal ničo druhe prajić, hač zo so mi tu w Kamjencu jara lubi.

Do teritorija Kamjenskeho policajskeho rewěra słušeja tež serbske gmejny. Što wo Serbach wěsće?

Pochadźam z Ohorna. Serbow znaju dotal jenož z dźěćatstwa, jako smy sej ze swójbu přeco zaso jutry křižerjow wobhladali. Hewak njemějach z nimi dotal sprawnje prajene žadyn zwisk. Na rewěrje mam tež serbskich kolegow a chcu so w přichodnym času pola serbskich wjesnjanostow předstajić.

Tež zawěsćenje wšelakich serbskich zarjadowanjow słuša nětko do Wašich zamołwitosćow.