Wuwzaćny staw dźensa dopołdnja w Choćebuzu: Znješkódnjenja bomby ...
Politika wšitko spjelnić njemóhła
Drježdźany (dpa/SN). Sakski ministerski prezident Michael Kretschmer (CDU) so za to wupraja, krizowy management koronapandemije dla wobšěrnje předźěłać. W tym zwisku móhł sej eksterny gremij po přikładźe tak mjenowaneje Kirchbachoweje komisije předstajić, rjekny Kretschmer w Drježdźanach. Skupina fachowcow pod nawodom bywšeho generala Zwjazkoweje wobory Hansa-Petera von Kirchbacha bě wotběhi w swobodnym staće za čas wulkeje wody Łobja w lětomaj 2002 a 2013 přepytowała a poručenja za wobchadźenje z dalšimi katastrofami zdźěłała. To móže sej premier Kretschmer „tež w tymle padźe předstajić“.
Sakski premier wšak přizna, zo je politika z někotrymi připowědźenjemi wočakowanja budźiła, kiž njemóžeše w kóždym padźe spjelnić a kotrež su mjez wobydlerjemi hněw wuwabili. Zo njejsu někotři hač do dźensnišeho připowědźenu nowembersku a decembersku pjenježnu podpěru dóstali, je „hoberski problem“ a je mnohim zakładnu akceptancu za škitne naprawy rubiło.
Dale a wjac ludźi za wolóženja
Frizerske salony zaso wotewrjene – srjedu dalše wuradźowanja
Berlin (dpa/SN). Najebać předznamjenja za bližacu so třeću žołmu koronapandemije w Němskej dźensa prěnje wobmjezowanja zjawneho žiwjenja zběhnu. Po wjace hač dwěmaj měsacomaj smědźa frizerske salony nětko zaso přistupne być. W někotrych zwjazkowych krajach su tež druhe zarjadnišća kaž zahrodnistwa, kwětkarnje a jězbne šule zaso wotewrjene.
Wotewrěć frizerske salony běchu zwjazkowa kanclerka Angela Merkel (CDU) a ministerscy prezidenća zwjazkowych krajow na swojim zetkanju 10. februara wobzamknyli. Zajutřišim, srjedu, chcedźa so znowa zetkać, tež zo bychu wo perspektiwje dalšich wotewrjenjow rěčeli. Ćišć na wšitkich wobdźělenych je wulki, dokelž sej ludźo wjace swobody přeja, fachowcy pak runočasnje přichodnu žołmu infekcijow připowědźeja. Hłowna přičina toho je, zo so nowe hišće strašniše mutacije koronawirusa dale rozšěrjeja.
To a tamne (01.03.21)
Na wšě 35 kilogramow stareje wołmy su wowcy wottřihali, kotraž žiworješe lěta dołho w awstralskich lěsach. Sobudźěłaćerjo zwěrjatownje běchu dospołnje zanjechane skoćo spočatk februara namakali. Mnóstwo wołmy wowcu tak poćežowaše, zo móžeše so lědma hišće pohibować a žrać. Mjeztym to Baarack zaso móže, kaž internetny widejo dopokazuje, kotryž su sej ludźo mjeztym 2,7 milionow króć wobhladali.
Zo chcył bamž Franciskus wotstupić, priwatny sekretar emeritowaneho bamža Benedikta XVI. Georg Gänswein jako ryzy spekulacije wotpokazuje. Přiwšěm tajka móžnosć wot starodawna wobsteji, rjekny 64lětny w Romje. W rozmołwje z argentinskimi nowinarjemi bě Franciskus rjekł, zo wočakuje swoju smjerć pak w zastojnstwje pak jako emeritowany bamž w Romje. To je spekulacije zbudźiło.
Ministerka w Afghanistanje
Berlin/Kabul (dpa/SN). Zwjazkowa zakitowanska ministerka Annegret Kramp-Karrenbauer (CDU) je dźensa bjez zjawneho připowědźenja do lěhwa němskich wojakow w Afghanistanje dolećała. Po tym zo bě zwjazkowe knježerstwo mandat zasadźenja wojakow w kraju pod Hindukušom hač do 31. januara 2022 podlěšiło, chcyše so ministerka wo połoženju w pólnym lěhwje Masar-i-Sharif wobhonić. Kaž Kramp-Karrenbauer potwjerdźi, chce Němska měrowy proces w Afghanistanje aktiwnje dale podpěrać.
Nalěty USA w Syriskej
Damaskus (dpa/SN). Při nalětach wojerskich lětadłow USA na wuchodźe Syriskeje je po informacijacj aktiwistow znajmjeńša 22 wojowarjow Iranej přichilenych milicow žiwjenje přisadźiło. Prezident USA Joe Biden bě nalěty přikazał, po tym zo běchu milicy w susodnym Iraku ameriske jednotki nadběhowali. Bě to prěni wójnski wukaz Bidena po zapokazanju do zastojnstwa. Ruska ameriske nalěty jako „swojowólne a zakonje ranjace postupowanje“ raznje kritizuje.
Lěwica woli nowe nawodnistwo
