Wjele infekcijow w Pólskej zličili
Šule zaso zawrěć?
Žadaja sej ruski serum Sputnik V
Berlin (dpa/SN). Po nachwilnym přetorhnjenju šćěpjenja přećiwo koronawirusej ze serumom Astrazeneca su so wjacori ministerscy prezidenća wuchodoněmskich zwjazkowych krajow za to wuprajili, ruske šćěpiwo Sputnik V wužiwać. „Ruska je wulki kraj wědomosće. Nimam najmjeńšeho dwěla, zo je tamniša wědomosć kmana skutkowny serum zhotowić“, rjekny sakski ministerski prezident Michael Kretschmer (CDU) nowinarjam. Ruske šćěpiwo měło wotpowědnu dowolnosć dóstać, ćim bóle, dokelž ma Němska hladajo na mnóstwo šćěpiwa problemy z kapacitami.
Ministerski prezident Saksko-Anhaltskeje Reiner Haseloff (CDU) praji: „Hdyž wo strowotu ludźi dźe, njesměło žanu rólu hrać, zwotkel serum pochadźa.“
Durinski ministerski prezident Bodo Ramelow (Lěwica) přeje sej wjetši ćišć na zwjazkowe knježerstwo, zo by wjace alternatiwnych šćěpiwow w Němskej dowoliło. Wotwisnosć wot seruma Astrazeneca kampanju šćěpjenja wohroža. Sputnik V dyrbjeli spěšnje přizwolić.
Srědki we Łužicy zasadźić!
Debata wo wužiwanju pomocy k strukturnej změnje zwonka rewěra
Grodk/Choćebuz (dpa/SN). Łužiske komuny Braniborskeje, hospodarstwo regiona a politikarjo sej žadaja, zo měli spěchowanske srědki Zwjazka k sylnjenju struktury w zwisku z kóncom zmilinjenja brunicy tež woprawdźe na městnje we wuhlowych kónčinach zasadźić. Pozadk nastawaceje debaty je mjez druhim twar noweho centruma Roberta Kochoweho instituta we Wildauwje južnje Berlina. Tam planuja slědźenišćo za kumštnu inteligencu w zwisku ze strowotu zjawnosće. Něhdźe sto dźěłowych městnow ma po informacijach instituta nastać. Twar financuja ze spěchowanskimi srědkami z fondsa za sylnjenje struktury we wuhlowych kónčinach.
Spodźiwne rozsudy
To a tamne (18.03.21)
Na čaporowych wikach kupjena stara škla je so jako chinska drohoćinka wukopała a wobsedźerjej wjele pjenjez wunjesła. Muž bě šklu z módro-běłym kwětkowym mustrom loni spontanje za 35 dolarow na wikach w staće USA Connecticut kupił. Pozdźišo da ju wot fachowcow awkciskeho domu posudźować. Při tym zwěsćichu, zo jedna so wo šklu z chinskeje dynastije Ming a zo eksistuje jenož hišće šěsć eksemplarow, zwjetša w muzejach. Na wčerawšim přesadźowanju wunjese škla 720 000 dolarow.
Paducha kwětkow lepiła je policija w Jenje. Muž bě w nocy na měšćanskej łuce połsta krokusow wurył a chcyše so zminyć, jako wot ludźi přiwołanych zastojnikow wuhlada. Woni jemu kazachu, swoju rubiznu nablaku zaso do zemje stykać. Nimo toho je wón nětko padustwa dla wobskorženy.
Nižozemska parlament woliła
Den Haag (dpa/SN). Nižozemjenjo su nowy parlament wolili. Wólbne lokale běchu wot 7.30 hodź. wotewrjene. 13 milionow wobydlerjow bě namołwjenych, 150 zapósłancow druheje komory parlamenta wolić. Koronapandemije dla su wólby lětsa na tři dny podlěšili. Póndźelu a wčera je jědnaće procentow ludźi swój hłós wotedało. Po dotalnych prognozach je ministerski prezident Mark Rutte jasny faworit. 37 stron je k wólbam nastupiło. Wuslědk wočakuja w 21 hodź.
Policija raciju přewjedła
Berlin (dpa/SN). Z raciju je němska policija dźensa rano přećiwo pašowarjam ludźi a prostituciji postupowała. Přepytowali su wosom objektow w Berlinje, Hamburgu a w Schleswigsko-Holsteinskej, policija zdźěla. Podhladni su pječa ilegalnje do Němskeje přišłe Vietnamjanki k prostituciji nuzowali. W Berlinje zajachu 43lětnu podhladnu. 160 zastojnikow bě zasadźenych. Přepytowanja měrja so přećiwo přemysłowemu pašowanju a nanuzowanej prostituciji.
Eisenmann politiku wopušći
Laschet za spěšniše šćěpjenje
Podobnje loteriji
To a tamne (17.03.21)
Widejowu konferencu wopicow su w čěskimaj zwěrjencomaj zarjadowali, dokelž zwěrjata bjez wopytowarjow přiběrajcy wostudu pasu. Tohodla su dwě wulkej wobrazowce w coologiskej zahrodźe Brno a w safarijowym parku Dvůr Králové nastajili, 150 kilometrow wot so zdalenej. Wothłós mjez šimpansami je dosć dobry, kaž ze zwěrjencow rěka. Zwěrjency susodneho kraja su z krótkim přetorhnjenjom dlěje hač poł lěta zawrjene.
Z nakładnym awtom do fasady šule zrazył je šofer w badensko-württembergskim Lahru. Transporter bě jemu předjězbu wzał. Na to zhubi wodźer ćežkeho sedłoweho wlečaka kontrolu, prasny do domu a wudrě hobersku dźěru. Dźěle twarjenja dyrbjachu z wěstotnych přičin zawrěć. Po prěnich trochowanjach wučinja škoda 130 000 eurow.
