Přiznaju, zo hišće ženje na Łazowskej karto­wej čarje njeběch a tuž tam tež ženje z kartami jězdźił njejsym. Štož pak tam tuchwilu zmištruja, před tym mam wulki respekt. Trenować prawje móžno njeje a tež wubědźowanja žane přewjesć njesmědźa. Wulki dźěl wudawkow za wudźeržowanje čary a jězdźidłow pak tu dale­ su a dyrbja zapłaćene być. Kartowa čara steji při tym jako přikład za nje­ličomne dalše tajke wólnočasne zarjad­nišća. Priwatnje wobhospodarjene drje lědma štó z mějićelow podpěru dóstawa a dyrbi so tuž na někajke wašnje přez čas pandemije bědźić, nadźijejo so lěpšich časow­. Štóž w zjawnych institucijach dźěła a stajnje dypkownje mzdu dóstawa, sej často předstajić njemóže, kak so tym dźe, kotřiž su wot dochodow swojeho přede­wzaća wotwisni. Hdyž potom swoje dźěło wukonjeć njemóžeja, je eksistenca wohrožena. Móžemy so jenož nadźijeć, zo tak wjele kaž móžno tychle zarjadnišćow pandemiju přežiwi. Marian Wjeńka

Nowy swětowy rekord nahromadźenych pinguinow nastajić chcetaj mandźelskaj Birgit Berends (48) a Stefan Kirchhoff (53) w Cuxhavenje – a potom z hromadźenjom přestać. Mjeztym mataj hižo štyri zapiski w Guinnessowej knize rekordow. Posledni pochadźa z lěta 2011 ze 11 000 pinguinami. Mjeztym trochujetaj wobstatk na 26 000 drjewjanych, metalowych abo pórclinowych eksemplarow. Na wšě 4 000 z nich pokazujetaj w swójskim muzeju w Cuxhavenje.

W poslednim rynku cyrkwje w Karls­ruhe je žona jutry njedźelu dźěćo porodźiła. Zwóńk Bonifaciusoweje cyrkwje bě młody porik při zastanišću tramwajki na druhim boku dróhi wobkedźbował. Pola žony běchu so hrona hižo započeli. W cyrkwi so mały hólc po 25 mjeńšinach narodźi. Wuchowanska słužba dowjeze z Afriki pochadźacu mać do chorownje.

Münster (B/SN). „Hdyž je Chrystus smjerć předobył, budźe tež nam móžno bój přećiwo koronawirusej dobyć.“ Takle Münsterski biskop Felix Genn z pomocu jutrowneho widejoweho poselstwa wjetšu nadźiju budźi. „We wobłuku cyrkwje so wjele ludźi čestnohamtsce angažuje. Dźakuju so wšěm, kotřiž staraće so wo chorych, starych a wosamoćenych a pokojeće mrějacych“, praji Genn, kiž zdobom kubłarki a kubłarjow kaž tež wučerki a wučerjow do swojeho poselstwa zapřijima. Wosebity dźak wupraja wón swójbam kaž tež samostejacym za starosć wo swoje dźěći a hladanje potrěbnych swójbnych. Biskop wěriwych namołwja „njespušćić nadźiju, zo koronu přewinjemy“.

Rozprawja wšědnje wo bamžu

Podstupim (dpa/SN). Ptača mrětwa je minjene měsacy w Němskej wjace škody zawinowała hač poslednja tajka w lětomaj 2016 a 2017. Wirus je tónkróć jasnje agresiwniši, štož plahowarjow pjerizny chětro starosći. Po cyłym Zwjazku dyrbjachu dotal něhdźe 1,8 milionow zwěrjatow zarězać, tehdy běchu tomu cyłkownje 1,2 milionaj. Šćěpjenje přećiwo wirusej aktualnje dowolene njeje, dokelž eksistuje přewjele typow. Tuž njeje tež wobšěrny škit přećiwo mrětwje móžny.

Šćěpja nětko tež w praksach

Berlin (dpa/SN). W Němskej zahaji so druhi schodźenk šćěpjenskeje kampanje přećiwo koronawirusej. Nětko smědźa tež domjacy lěkarjo ludźi šćěpić. Po cyłej Němskej steji w prěnim tydźenju za to 940 000 dozow k dispoziciji, štož woznamjenja 26 dozow na jednu praksu. Cyłkownje 35 000 lěkarskich praksow po cyłej Němskej so w druhim schodźenku sobu wobdźěli. Centralne přeprošenja za pacientow pak žane rozdźělene njebudu. Terminy praksy sami rjaduja.

Zahaja modelowy projekt