Berlin (dpa/SN). W zwjazkowej stolicy su wčera koordinowacy gremij Zwjazka a štyrjoch brunicowych krajow załožili a zdobom dojednanje mjez Zwjazkom a krajemi wo planowanych inwesticijach w zwisku ze strukturnej změnu podpi­sali. Při tym hišće raz potwjerdźichu, zo ma zmilinjenje wuhla najpozdźišo hač do lěta 2038 skónčene być. Koordinowacy gremij ma so wo wuwažene a sprawne rozdźělenje srědkow postarać a potrjechenym kónčinam optimalnu pomoc za­ru­­čić. Zwjazkowe knježerstwo chce strukturnu změnu ze 40 miliardami eurow podpěrować. Na jednym boku inwestuja do nowych slědźenskich institucijow, na druhim boku podpěruja wotpowědne programy krajow z přiražkami. Šěroko zapołožena komisija politiki, hospodarstwa, škitarjow klimy a wědomosće bě wotpowědne namjety zdźěłała. Po informacijach medijow jedna so najprjedy raz wo 80 projektow.

Rozestajenje nastupajo pokutu tym, kotřiž wotpokazuja sej we wobchodach, w busu abo ćahu nós a hubu škitać, je wčera bicarny raz docpěło. Jako jenički zwjazkowy kraj je Saksko-Anhaltska wotpokazał, wot zwjazkoweje kanclerki Angele Merkel nastor­čene chłostanje 50 eurow hrěšnikej abo hrěšnicy přihłosować. Naraz bě tamniši ministerski prezident Reiner Haseloff do róle njepowučomneho stłóčeny, kotrehož zadźerženje je – miłe wuprajene – njesolidariske. Fakt, zo će w Saksko-Anhaltskej w zjawnym bliskowobchadźe bjez nahub­nika ani njetransportuja, njezajimowaše. A zo móže wuzamknjenje ze sobujězdźenja wjetša pokuta być hač 50 eurow, dyrbiš sej najprjedy raz tež wuwě­domić. Po Roberta Kochowym instituće je aktualna ličba korona-nowoinfekcijow w Bayerskej znowa nimale trójce tak wulka hač w cyłej wuchodnej Němskej. Tohodla su rozdźěle woprawnjene. Škit před nowej koronažołmu pak je wažny, to bjez wobmjezowanjow dale płaći. Axel Arlt

Berlin (dpa/SN). Reagujo na zakaz jutře planowaneje demonstracije přećiwo korona-politice knježerstwa su pola policije zwjazkoweje stolicy třitysac nowych demonstracijow přizjewili. Zastojnicy wočakuja, zo ličba přizjewjenjow dale přiběra, dokelž jewja so w interneće wotpowědne namołwy. Dotal njeje jasne, hač so zarjadowanja woprawdźe wotměja. Generelnje zakazać demonstracije njemóža, rěčnica policije zdźěli. Kóždy móže demonstraciju jednorje a spěšnje z formularom na internetnej stronje policije přizjewić.

Na najwjetše zarjadowanje kónc tydźenja bě iniciatiwa „Querdenken 711“ ze Stuttgarta za jutře 22 000 wobdźělnikow na Dróze 17. junija njedaloko Braniborskich wrotow přizjewiła. Srjedu bě policija wjacore zarjadowanja wšelakich iniciatiwow zakazała. Nutřkowny senator Andreas Geisel (SPD) bě rozsud z tym wopodstatnił, zo běchu demonstranća na minjenych zarjadowanjach wědomje hygieniske předpisy ranili. Wšelake iniciatiwy swojich přiwisnikow mjeztym namołwjeja, najebać zakaz demonstracije do Berlina přijěć a so zhromadźić.

Washington (dpa/SN). Z hrózbnym scena­rijom w padźe wólbneho dobyća Demokratow USA je prezident Donald Trump k zakónčenju zjězda Republikanow za swoje znowawuzwolenje jako prezident wabił. „Nichtó njebudźe w Ame­rice Bidena hižo wěsty“, rjekny Trump wo swojim wužadarju Joewje Bidenje. „Dołhož sym prezident, zakituju prawo kóždeho Američana, we wěstoće, dostojnosći a swobodźe žiwy być směć. Republikanska strona wostanje hłós patrio­tiskich rjekow, kotřiž wěstotu Ameriki zaručeja.“ Joe Biden je we wočomaj Trumpa „trojaniski kóń socializma“.

Joe Biden je mjeztym wumjetowanja Trumpa wotpokazał, zo njeby Amerika z nim jako prezident hižo wěsta dosć była­. „Hdyž Donald Trump dźensa wječor rjeknje, zo njebudźeće w Americe Joewa Bidena hižo wěsći, wobhladujće so a prašejće so: Kak wěsći čujeće so w Americe Donalda Trumpa?“, Biden rjekny.

Trump dźeržeše swoju kónčnu narěč zjězda Republikanow na zahrodźe Běłeho domu we Washingtonje. Kritikarjo jemu­ wumjetuja, zo tak sydło zastojnstwa politisce znjewužiła.