Berlin (dpa/SN). Němski zwjazkowy sejm chcyše dźensa wo ćěkancach w lěhwje Moria na grjekskej kupje Lesbos wuradźować. Lěwica bě próstwu zapodała a sej žadała, zo měło knježerstwo „jako prěnju kročel něhdźe 13 000 ludźi, kotřiž su wohenja w lěhwje dla bjezdomni, přiwzać, nochcedźa-li do druhich krajow“. Kanclerka Angela Merkel (CDU) a francoski prezident Emmanuel Macron běštaj so na to dorozumiłoj, z dalšimi krajemi EU štyrista njepřewodźanych młodostnych přiwzać. Mjeztym je dźewjeć dalšich krajow k tomu zwólniwych.

Zrudźace rekordy

San Francisco (dpa/SN). Wotsrjedź awgusta howrjace lěsne wohenje w sewjernej Kaliforniskej su so mjeztym na płoninu wjac hač 1 906 kwadratnych kilometrow rozpřestrěli. Najwjetši to woheń młódšich stawiznow wobwoda Mendocino County. Wčera wojowaše tam 14 000 wobornikow na 29 městnach přećiwo płomjenjam. Jenož lětsa bu w Kaliforniskej přez wohenje płonina wjac hač 12 500 kwadratnych kilometrow zničena.

Chcedźa cyłe twornje zawrěć

Schwerin (dpa/SN). Dobre štyri tydźenje po wozjewjenju hrožaceho lista třoch senatorow USA přećiwo zamołwitym mórskeho přistawa Sassnitz-Mukran je ministerska prezidentka Mecklenburgsko-Předpomorskeje Manuela Schwesig (SPD) we wotmołwnym lisće z jasnymi słowami reagowała. „W spisu přistawej připowědźene sankcije a chłostanske naprawy najraznišo wotpokazuju“, tam rěka. Ze spisom senatorow jewješe so prěni raz pad, w kotrymž měrja so hroženja USA w zwisku z płunowodom Nord Stream 2 direktnje přećiwo jednomu z němskich předewzaćow.

W lisće, kotryž tež powěsćerni dpa předleži, wobara so Schwesig pospytam, němsku energijowu politiku wobwliwować. „Je suwereny rozsud zwjazkoweje republiki, zwotkel a po kotrym puću wona swoju energiju bjerje“, politikarka SPD wuzběhnje. Nimo toho so cyły rjad dalšich krajow w Europje na to spušća, zo budźe pipeline bórze dotwarjena.

Lipsk/Drježdźany (dpa/SN). Na wčerawšim cyłoněmskim warnowanskim dnju je so tež w Sakskej tójšto nimokuliło. Tak dóńdźe warnowanska app hakle z wulkim zapozdźenjom na mobilne telefony. Sireny, kotrež mějachu dypkownje w 11 hodź. wuć, na mnohich městnach mjelčachu. Přichodne dny chcedźa misnjenja na zwjazkowej a komunalnej runinje wuhódnoćić, zdźěli sakske nutřkowne ministerstwo w Drježdźanach. Zamołwići ministerstwa rěča přiwšěm wo „wažnym pruwowanju systemow“.

Zwjazkowy zarjad za škit wobydlerjow w Bonnje je mjeztym misnjenja warnowansku app za mobilne telefony nastupajo přiznał. Hłowna přičina je runočasne aktiwizowanje wjacorych warnowanskich systemow, štož wjedźeše k přećeženju techniki. Planowane bě systemy přez Zwjazk jónkrótnje aktiwizować. Tež w druhich krajach je k misnjenjam dóšło.