Drježdźany (dpa/SN). Sakska koalicija CDU, SPD a Zelenych njeje ze zestawu dwójneho etata za lěće 2021 a 2022 hišće spokojom a chce dźensa w mjeńšich skupinach dale wuradźować. Etatowu klawsuru běchu póndźelu rozkorow dla přetorhnyli. „Třo partnerojo w jednym knježerstwje trjebaja wjace chwile rozrisanje nańć“, měnješe kultusowy minister Christian Piwarz (CDU).

Mjeztym zo stej stronje Zeleni a CDU přećiwo nowym dołham za inwesticije, nochce to SPD cyle wuzamknyć. „To njeměł žadyn tabu być“, podšmórny frakciski šef SPD Dirk Panter.

„Jednanja su mjezykrok. Z našeho wida je zakładnje móžno so dojednać“, wuswětli předsydka frakcije Zelenych w Sakskim krajnym sejmje Franziska Schubert. Při wčerawšim wothłosowanju bu wona znowa w zastojnstwje wobkrućena. Parlamentariski jednaćel wostanje Valentin Lippmann, městopředsydka frakcije je dale Christin Melcher.

Stipendijowy program za wučerjow na wsy w Braniborskej njeje wunamakanka aktualneho knježerstwa SPD, CDU a Zelenych. Tajki bě swój čas kubłanski minister Günter Baaske hižo předpołožił. Móžeš rjec, zo chcedźa pedagogam nětko ze 600 eurami powołanski zastup w šuli zwonka wulkich městow pozłoćić. Wuchadźejo z toho, zo je z Podstupimskeho wida hižo delnjołužiska metropola Choćebuz wone „na wsy“, wěmy, što to za woprawdźite wjesne kubłanišća rěka, wo serbskich w Delnjej Łužicy ani njerěčo. Bohužel wostanje naćisk stipendijoweho programa wosebitu zamołwitosć Braniborskeje za wuwučowanje delnjoserbšćiny nastupajo dale tak ignorantny a zwjeršny, kaž su to Delnjoserbja w kubłanskich naležnosćach dotal často nazhonić dyrbjeli. Zo njebě ministerstwo za kubłanje, młodźinu a sport na wčerawšim posedźenju serbskeje rady w Podstupimje ani fachowje zastupjene, je dalši wuraz za mnje nje­zrozumliweho jednanja. Axel Arlt

Dokelž njemóžeše žona swoju ruku hižo z gullyjoweho wěka w Siegburgu wućahnyć, zawołachu starosćiwi přećeljo wuchowansku słužbu. Młodej žonje bě mjenujcy kluč do gullyja padnył, a tón chcyše wona wućahnyć. Ruka pak tčacy wosta. Z pomocu wosebiteho maza su wuchowarjo žonu w běhu jenož někotrych mjeńšin wuswobodźili.

Romski kołk, debjenki ze srjedźowěka, hrajki z wiktorianskeho časa: Štóž w Londonje podłu rěki Thames za něčim pyta, móže jónkrótne kruchi nańć. Tuž přeprošuje organizacija Thames Explorer Trust na pućowanje, zo bychu za pokładami pytali. Kaž archeologowka Vanessa Bunton rozkładźe, bě rěka za čas Ro­mjanow najwjetša deponija wotpadkow. W zwisku z přiliwom a wotliwom wody w rěce so tam tuž zas a zaso njewšědne relikty na přibrjóh dóstawaja.

Berlin (dpa/SN). Politikarka Zelenych a zamołwita za nutřkowne naležnosće Irene Mihalic so znowa za to wupraja, zo trjeba policija njewotwisnych narěčenskich partnerow za pokazki nastupajo prawicarskoekstremistiske pady. Woni měli zwonka hierarchije zakótwjeni być, rjekny Mihalic rano w telewiziji ZDF. Pozadk toho je dźensa wozjewjena rozprawa zwjazkoweho nutřkowneho ministra Horsta Seehofera (CSU) wo prawicarskoekstremistiskich padach we wěstotnych zarjadach Zwjazka a krajow.

W ÖPNV znowa stawkuja

Frankfurt nad Mohanom (dpa/SN). Tydźeń po prěnich warnowanskich stawkach zjawneho bliskowobchada (ÖPNV) njeje dźensa znowa wjele busow a tramwajkow jěło. Dźěłarnistwo ver.di bě w Hessenskej k stawkam namołwjało. We wjacorych wulkich městach, kaž Frankfurće nad Mohanom, Wiesbadenje abo Kasselu, přistajeni tuž stawkuja. W Bremenje a Delnjej Sakskej sobudźěłaćerjo akciju jutře zahaja. Ver.di zasadźa so za nowe tarifowe zrěčenje přistajenych zjawneho bliskowobchada po cyłym Zwjazku.

Daty składować zakazane